Монгол Улс болон НҮБ-ын ХХААБ хооронд хүлээн авагч улсын гэрээ байгуулах асуудлыг Байнгын хороотой зөвшилцөнө

Монгол Улсын Засгийн газрын ээлжит хуралдаан 2025 оны долоодугаар сарын 30-ны өдөр болж, Монгол Улсын Засгийн газар болон Нэгдсэн Үндэстний Байгууллагын Хүнс, хөдөө аж ахуйн байгууллага (НҮБ-ын ХХААБ) хооронд байгуулах “Хүлээн авагч улсын гэрээ”-ний төслийг хэлэлцэн, Улсын Их Хурлын холбогдох Байнгын хороотой зөвшилцөхөөр шийдвэрлэлээ.

Монгол Улс 1973 оны 11 дүгээр сарын 12-ны өдөр НҮБ-ын Хүнс, хөдөө аж ахуйн байгууллагад гишүүнээр элссэн бөгөөд өлсгөлөн, шим тэжээлийн дутагдлыг арилгах, хүнсний аюулгүй байдлыг хангах дэлхийн нийтийн зорилгыг дэмжиж, идэвхтэй оролцсоор ирсэн билээ. НҮБ-ын ХХААБ нь зөвхөн хүнс, хөдөө аж ахуйн салбарт бус, байгаль орчны хамгаалал, усны нөөцийн менежмент, хөдөө аж ахуйн дэвшилтэт технологи, мал эмнэлэг зэрэг олон чиглэлээр Монгол Улсын тогтвортой хөгжилд үнэтэй хувь нэмэр оруулж ирсэн, стратегийн ач холбогдол бүхий олон улсын байгууллага юм.

“Хүлээн авагч улсын гэрээ” хүчин төгөлдөр болсноор Монгол Улсад үйл ажиллагаа явуулж буй НҮБ-ын Хүнс, хөдөө аж ахуйн байгууллагын Суурин төлөөлөгчийн газрын эрх зүйн статус болон үйл ажиллагааны хүрээ албан ёсоор шинэчлэгдэн баталгаажих юм.