“Айлын байшин руу хулгай орчихлоо” гэх мэдээлэл энэ оны долдугаар сарын 27-ноос 28-нд шилжих шөнө цагдаагийн байгууллагад бүртгэгдсэн байна. Тодруулбал, Хөвсгөл аймгийн нутаг дэвсгэрт оршин суудаг иргэний гэрт 31-46 насны гурван этгээд хууль бусаар нэвтэрч хулгай хийж байсныг цагдаагийн байгууллага илрүүлжээ. Уг этгээдүүд нь 2025 оны долдугаар сарын 17-ноос хойш нийт 12 удаагийн үйлдлээр иргэдийн орон байранд хууль бусаар нэвтэрч, 60 ширхэг элдсэн хурганы арьс, хурган дотортой дээл, мөнгөн аяга, монгол гутал, суран бугуйл, борц, шүрэн толгойтой хөөрөг зэрэг эд зүйлсийг хулгайлсан болох нь урьдчилсан байдлаар тогтоогдсон байна. Цагдаагийн байгууллагаас уг хэргийг мөрдөн шалгаж, холбогдох ажиллагааг үргэлжлүүлэн явуулж байна.

Иргэдийг орон байраа удаан хугацаагаар эзгүй орхих тохиолдолд хаалга, цоожийг найдвартай бэхлэх, хөршийн холбоогоо сайжруулах, мөн цахим орчинд гэрээсээ хол байгааг илтгэсэн зураг, бичлэг нийтлэхгүй байхыг анхаарууллаа.