ОХУ-ын Алс Дорнодын Камчаткийн хойг орчимд 8.7 магнитудын хүчтэй газар хөдлөлт болж, үүний улмаас цунамийн гурван давлагаа Умард Курил хотын эргийн бүсэд орж ирснийг албаны эх сурвалж мэдээллээ.

Энэ нь 1952 оноос хойших бүс нутгийн хамгийн хүчтэй газар хөдлөлтөөр бүртгэгдэж байна. Цунамийн эхний давлагаа эрэгт ойролцоогоор 200 метрийн гүн нэвтэрсэн бөгөөд удаах хоёр давлагааны сүүлийнх нь хамгийн хүчтэй байжээ. Үүний улмаас боомтод бэхлээтэй байсан усан онгоцууд далайн хоолой руу түрэгдэн орж, боомтын дэд бүтэц ноцтой эвдэрсэн тухай Умард Курил хотын захирагч Александр Овсянников мэдээлсэн байна. Тэрбээр “Хамгийн сүүлчийн давлагаа боомтын дэд бүтцэд ихээхэн хохирол учруулсан” гэв. Оросын Онцгой байдлын яамны мэдээлснээр, тус хотын боомт болон “Алаид” загасны үйлдвэр усанд автсан бөгөөд оршин суугчдыг өндөрлөг газар руу нүүлгэн шилжүүлээд байгаа аж. Мөн газар хөдлөлтөөс үүдсэн хүчтэй чичирхийлэл нэг сарын турш үргэлжлэх магадлалтай бөгөөд 7.5 магнитуд хүртэл хүрч болзошгүй хэмээн судлаачид анхааруулжээ. Цунамийн улмаас зөвхөн ОХУ гэлтгүй олон улсын хэмжээнд аюулын түгшүүр зарлагдаад байна. Тухайлбал, Японы зүүн эргийн дагуу болон АНУ-ын Аляска, Калифорни, Орегон муж улсуудад цунамийн аюулын түгшүүр өгсөн тухай холбогдох байгууллагууд мэдээллээ. Цаашид газар хөдлөлтийн давтамж нэмэгдэж, цунамийн давлагаа дахин ирэх эрсдэл байгааг мэргэжилтнүүд анхааруулж байгаа тул иргэдийг анхаарал болгоомжтой байхыг уриалж байна.