Сүүлийн өдрүүдэд банкны нэрийг барьсан хуурамч мессеж олон нийтэд ихээр ирж байгаа бөгөөд энэ нь цахим залилангийн шинэ төрөл болохыг мэргэжилтнүүд анхааруулж байна.

Тодруулбал, залилагч этгээдүүд олон оронтой гадаад дугаараас иргэдийн гар утсанд линк, текст агуулсан мессеж илгээж, интернэт банкны нэвтрэх нэр, нууц үгийг хуурч авахыг оролдож байна. Хэрэв хэрэглэгч тухайн холбоос дээр дарж, хувийн мэдээллээ оруулбал залилагчид тухайн иргэний цахим банк руу нэвтэрч, санхүүгийн хохирол учруулж болзошгүйг албаныхан анхааруулж байна.

Банкны зүгээс харилцагчийн интернэт банкны нэвтрэх нэр, нууц үгийг мессежээр шаардах, илгээх тохиолдол байхгүй гэдгийг онцолжээ.

Хэрэв иргэн мессежээр ирсэн холбоос дээр дарж, хувийн мэдээллээ оруулсан бол:

• Интернэт банкны нууц үгээ нэн даруй солих,

• Үйлчилгээг түр идэвхгүй болгох,

• Холбогдох банкны лавлах утсанд хандах зэрэг арга хэмжээ яаралтай авахыг зөвлөж байна.

Ийм төрлийн цахим гэмт хэрэг нь иргэдийн анхаарал болгоомжгүй байдлыг ашиглан үйлдэгддэг тул иргэн бүр санхүүгийн аюулгүй байдалдаа хариуцлагатай хандах шаардлагатай байна.