Үндэсний агаарын тээвэрлэгч МИАТ ТӨХК Канадын “Bombardier” компанийн үйлдвэрлэсэн CRJ-700 маягийн шинэ агаарын хөлгийг өнөөдөр хүлээн авжээ.Тус онгоц нь Өмнөд Африкийн Бүгд Найрамдах Улсын Йоханнесбург хотоос нийт 12,265 км-ийн нислэг үйлдэн Монгол Улсад ирсэн бөгөөд “Ирвэс” хэмээх нэртэй. CRJ-700 нь ойрын зайн нислэгт зориулагдсан, түлшний хэмнэлттэй, дэвшилтэт загварын онгоц бөгөөд өмнө нь МИАТ ТӨХК 2024 онд “Мазаалай” нэртэй ижил төрлийн онгоцыг ашиглаж эхэлсэн билээ. Тус онгоцоор Өвөр Монголын Хөх хот болон орон нутгийн чиглэлд нислэг үйлдэж байна.

Шинээр ирсэн “Ирвэс” онгоц нь нэг цагт дунджаар 1.5 тонн түлш зарцуулдаг бөгөөд нэг суудалд ногдох түлшний хэмжээ 21.4 литр аж. Түүнчлэн зорчигчдын тав тухыг хангасан хөлийн зай том, суудал өргөн, тээшний багтаамж сайтай зэрэг онцлогтой. Агаарын хөлөг нь GE CF34-8C5B1 маркийн хүчирхэг турбофан хөдөлгүүртэй бөгөөд хөөрөлтийн үед 61.3 кН хүртэл хүч гаргах чадалтай. Аэродинамикийн дэвшилтэт бүтэц, түлш бага зарцуулалт, хүлэмжийн хийн ялгаралт багатай зэрэг үзүүлэлтүүд нь байгаль орчинд ээлтэй байх МИАТ ТӨХК-ийн бодлогод нийцэж байгааг тус компанийн зүгээс онцолж байна.

Bombardier CRJ-700 агаарын хөлгийн техникийн үзүүлэлтүүд:

Их биеийн урт: 32.3 м

Их биеийн өргөн: 7.7 м

Хөдөлгүүр: GE CF34-8C5B1

Хөдөлгүүрийн хүч: 12,670 Lbf

Түлшний багтаамж: 10,989 литр

Суудлын тоо: 70

Нислэгийн алслалт: 2,655 км

Ачааны хэсгийн багтаамж: 15.5 м³

Хөөрөлтийн дээд жин: 34,000 кг

Дээд хурд: 876 км/цаг

Нислэгийн дээд өндөр: 41,000 ft