Хавдар судлалын үндэсний төвийн подвалд долдугаар сарын 28-ны өдөр засварын ажил гүйцэтгэх явцад гагнуурын оч тархсанаас үүдэн гал гарсан ч нөхцөл байдалд шуурхай арга хэмжээ авч, галыг бүрэн унтраажээ. Галын улмаас гэмтсэн, бэртсэн, хүндэрсэн хүн бүртгэгдээгүй байна. Өнөөдөр эмнэлгийн тусламж, үйлчилгээ бүрэн хэвийн горимд шилжсэн бөгөөд өчигдөр товлосон амбулаторийн үзлэг, шинжилгээ, мэс засал болон бусад тусламж үйлчилгээг өнөөдөр нөхөн үзүүлэх ажлыг зохион байгуулж байгаа ажээ.Мөн гал гарсан үед эмчлүүлэгч, үйлчлүүлэгч, ажилтнуудыг аюулгүй нүүлгэн шилжүүлж, хагалгаа, эрчимт эмчилгээний тасгуудад онцгой хяналт тавьж, яаралтай тусламжийг гамшгийн үеийн бэлэн байдалд шилжүүлэн шуурхай ажилласан байна.

Одоогоор галын шалтгаан, хохирлын хэмжээг холбогдох мэргэжлийн байгууллагууд шалгаж, үнэлж байгаа юм. ХСҮТ-ийн хамт олон гамшгийн нөхцөлд шуурхай ажиллаж, мэргэжлийн түвшинд арга хэмжээ авсан Онцгой байдлын алба, Цагдаагийн байгууллага болон холбогдох бүх байгууллагад гүн талархал илэрхийлжээ.

 Эх сурвалж: Хавдар судлалын үндэсний төвийн Гамшгийн шуурхай штаб