Шинэ Үндсэн хуулийг бүтээлцэхэд нөр их хувь нэмэр оруулсан нутгийн эрхмүүдийг алдаршуулан дурсгалаа. Анхдугаар Үндсэн хуулийн түүхэн ач холбогдлыг тодотгож, шинэ Үндсэн хуулийн үзэл санааг түгээн дэлгэрүүлэх, сахин мөрдөх зорилгоор батлагдсан УИХ-ын 43 дугаар тогтоолын хүрээнд Увс аймгийн Иргэдийн Төлөөлөгчдийн Хурлын хуралдааны танхимд Үндсэн хуулийг хүндэтгэлтэйгээр заллаа. Улсын Их Хурал, Засгийн газрын гишүүд, УИХ-ын Ерөнхий нарийн бичгийн дарга Б.Баасандорж оролцсон бөгөөд тэрбээр Үндсэн хуулиа дээдлэн залах нь зөвхөн ёслолын шинжтэй бус, иргэн бүрийн ухамсарт хэрэгжих эрхэм зорилго хэмээн онцоллоо. Тэрбээр мөн шинэ Үндсэн хуулийг батлахад үнэтэй хувь нэмэр оруулсан нутгийн удамт сэхээтнүүдийг алдаршуулан дурдав. Үүнээс гадна 126 гишүүнтэй шинэ парламент хүний эрх, эрх чөлөөг баталгаажуулах, иргэдийн оролцоог нэмэгдүүлэх, ил тод байдал, олон талт түншлэлийг бэхжүүлэх чиглэлээр ажиллаж буйг тэмдэглэлээ. Заллагын ёслол Увс аймгийн түүхт 100 жилийн ойтой давхцаж буй нь онцлогтой. Энэ үеэр УИХ-ын Ерөнхий нарийн бичгийн дарга “Үндсэн хуулиа дээдлэн залах тухай” тогтоолыг ИТХ-ын дарга П.Баттулгад гардуулж, Үндсэн хууль судлалын бүтээлийн дээжийг хүлээлгэн өглөө.

Ёслолд УИХ-ын гишүүн, Эрчим хүчний сайд Б.Чойжилсүрэн, Аж үйлдвэр, эрдэс баялгийн сайд Г.Дамдинням, УИХ-ын гишүүн О.Цогтгэрэл, Э.Болормаа, О.Заяабал, М.Мандхай, Д.Батбаяр нар оролцлоо. Үүний дараа БНМАУ-ын Ардын жүжигчин, Ардын Их Хурлын депутат Гомбын Түмэндэмбэрэлийн хөшөөний нээлтэд оролцлоо. Хөшөөг Улаангом хотын Ойрад театрын өмнөх талбайд байрлуулж, уран барималч Ж.Түмэнчулуун урласан бөгөөд тайзан дээр дуулах үеийн төрхийг дүрсэлжээ. Мөн Ерөнхийлөгч У.Хүрэлсүх, УИХ, Засгийн газрын гишүүд, аймгийн удирдлагууд, нутгийн алдартнуудын хамт төр, нийгмийн нэрт зүтгэлтэн маршал Ю.Цэдэнбалын хөшөөнд цэцэг өргөн, хүндэтгэл үзүүллээ.