Вируст гепатиттай тэмцэх дэлхийн өдөртэй холбогдуулан ЭМЯ мэдээлэл өглөө. Энэ үеэр Эрүүл мэндийн сайд Ж.Чинбүрэн “2017 онд Монгол улс “Элэг бүтэн Монгол” үндэсний хөтөлбөрийг хэрэгжүүлж эхэлсэн. Үүнийхээ хүрээнд B, C вирустэй иргэдийн өвчлөл, тархалт хэр зэрэг байгааг болон орчин үеийн эмчилгээний аргуудыг нэвтрүүлэх үе шат явуулж байсан. Хоёр сая гаруй иргэдийг 2020 он хүртэл элгэний B, C вирусийн шинжилгээ хийж, тархалтыг судалсан.

    Нэгдүгээрт C вирусийг бүрэн устгаж чаддаг эм дэлхийд гарсан. Энэ эмийн патентыг эзэмшдэг компанитай гэрээ хэлэлцээр хийж 99 хувийн хямдралтай үнээр нэвтрүүлж байгаа. B вирусийн хувьд хамгийн гол урьдчилан сэргийлэх арга бол вакцинжуулалт. Нярай хүүхдэд 24 цаг дотор хийж B вирусийн халдвараас сэргийлдэг. Учир нь гэвэл тав хүртэлх насны хүүхэд ямар нэг тохиолдлоор авах юм бол тэр нь архаг болох магадлал 90 хувь байдаг. Харин насанд хүртэн хүн халдвар авахад архаг болох магадлал 20 хувь буюу өөрөө эдгэрэх магадлалтай байдаг.

    Хоёрдугаарт эхээс урагт B вирус тархах магадлал Монгол улсад нэлээдгүй байдаг. Шалтгаан нь В вирус хүн амын дунд арван хувьтай байсан учраас энэ нь төрөх явцад дөнгөж төрж буй нярайд цусаар халдварлаж өвчилдөг. Тиймээс жирэмсэн, төрөх гэж буй эмэгтэйчүүдэд В, С вирус байгаа эсэхийг шалгах хэрэгтэй.

     Гуравдугаарт D вирусийн халдварын талаар мэдээллэнэ. Монгол улс элэгний B, C вирусээр дэлхийд дээгүүрт бичигддэг. Тэр дотроо B вирустэй хүнд D вирус дагалдах тохиолдол өндөр байдаг. Зарим судлаачид 70 хувь байдаг гэдэг. Харин бодитоор бол 60-65 хувийн магадлалтай. D вирус Монголоос өөр оронд элбэг байдаггүй. Нийгмийн тулгамдсан асуудал биш учраас D вирусийн эмчилгээ нэлээд хожуу хөгжсөн ч амжилт гарсан. 2018, 2019 онд ОХУ, БНГУ-ын эрдэмтэд хамтраад эм, тариа гаргасан. Гэхдээ бас л дарангуйлдаг, бүрэн устгадаггүй” гэв.