2025 оны долдугаар сарын 28-ны 11:00 цагийн байдлаар улсын хэмжээнд 14 ойн түймэр идэвхтэй байгаа бөгөөд үүнээс долоог нь цурамд оруулж, бүрэн унтраахаар Онцгой байдлын байгууллагынхан ажиллаж байна. 

Сэлэнгэ аймгийн Хүдэр суманд дөрөв

Ерөө суманд гурав

Мандал суманд нэг

Баян-Өлгий аймгийн Цэнгэл суманд нэг

Одоогоор эдгээр долоон түймэр дээр Онцгой байдлын байгууллагын 265 алба хаагч, 11 автомашин, мэргэжлийн ангийн 191 хүн, 17 автомашин буюу нийт 456 хүн, 28 автомашин, нэг нисдэг тэрэг, 15 морьтой алба хаагч үүрэг гүйцэтгэж байна. Мөн ОБЕГ-ын харьяа Агаараас эрэн хайх, аврах 111 дүгээр ангийн нисдэг тэргээр алба хаагчдыг гал түймрийн голомтод хүргэх тээвэрлэлтийг тогтмол зохион байгуулж байгаа бол эрүүл мэндийн тусламж үйлчилгээг Үндэсний аврах бригад, “Жаргалант” сэргээн засах төвийн 113 дугаар анги, НОБГ-ын эмч, сувилагчид газар дээр нь үзүүлж байна. Он гарсаар улсын хэмжээнд 13 аймгийн 71 сум, нийслэлийн гурван дүүрэгт нийт 206 удаагийн ой, хээрийн гал түймэр бүртгэгдээд байгаа нь өнгөрсөн оны мөн үеийнхтэй харьцуулахад 57 хувиар өссөн үзүүлэлттэй байна.