Онцгой байдлын ерөнхий газар болон Бүгд Найрамдах Тажикистан Улсын Засгийн газрын дэргэдэх Онцгой байдал, Иргэний хамгаалалтын хороо хамтран ажиллах харилцан ойлголцлын санамж бичгийн хүрээнд хоёр талт уулзалт зохион байгууллаа. Уулзалтын үеэр Монголын төлөөлөгчид Тажикистаны Зарлан мэдээлэх шуурхай удирдлагын төвөөр зочилж, тэдний шуурхай удирдлага, зохион байгуулалтын ажиллагаатай танилцжээ. Энэ хүрээнд хамтын ажиллагааг шинэ шатанд гаргах зорилгоор хэд хэдэн асуудлыг тохиролцлоо.

• Харилцан ойлголцлын санамж бичгийг хэрэгжүүлэх хамтарсан ажлын хэсэг байгуулах.
• Тогтмол уулзалт зохион байгуулах.
• Алба хаагч, мэргэжилтнүүдийг харилцан солилцох, туршлага судлуулах.
• Аврах ажиллагаа, гамшгаас хамгаалах чиглэлээр сургалт, дадлага, хамтарсан сургуулилт зохион байгуулах.
• Техник, тоног төхөөрөмжийн бэлэн байдлыг хангах, мэдлэг, арга туршлагаа хуваалцах, харилцан дэмжлэг үзүүлэх.

Тус уулзалт болон туршлага судлах арга хэмжээ нь хоёр орны Онцгой байдлын байгууллагуудын уялдаа холбоог бэхжүүлэх, гамшгийн эрсдэлийг бууруулах, хохирлыг багасгах хамтарсан үйл ажиллагаа болжээ. Хамтарсан ажлын хэсэг байгуулагдсанаар цаашид хоёр талын хамтын ажиллагаа илүү системтэй, үр дүнтэй болж, гамшгийн үед шуурхай, уялдаа холбоотой ажиллах нөхцөл бүрдэх юм.