Монгол Улсын Шадар сайд, Улсын онцгой комиссын дарга С.Амарсайхан ОБЕГ-ын Ажиллагааны шуурхай штабт ажиллаж, 21 аймаг болон нийслэлийн Шуурхай штабын бүрэлдэхүүнтэй цахим хурал хийж цаг үеийн нөхцөл байдлын талаар мэдээлэл сонслоо. Он гарснаас хойш улсын хэмжээнд 13 аймгийн 71 сум, нийслэлийн гурван дүүрэгт нийт 204 удаагийн ой, хээрийн гал түймэр бүртгэгдсэн байна. 2025 оны долдугаар сарын 27-ны 16:00 цагийн байдлаар Сэлэнгэ аймгийн Хүдэр суманд долоо, Ерөө суманд зургаа, Мандал суманд хоёр түймэр гарснаас наймыг нь цурамд оруулж бүрэн унтраахаар, зургааг нь хяналтад авч ажиллаж байгаа аж. Уг ажиллагаанд Онцгой байдлын байгууллагын болон мэргэжлийн ангийн нийт 456 хүн, 29 автомашин, нэг нисдэг тэрэг дайчлагджээ. Мөн долдугаар сарын 24-25-нд шилжих шөнө Сүхбаатар аймгийн Халзан, Уулбаян, Төв аймгийн Аргалант, Баянхангай, Лүн, Эрдэнэсант сум, нийслэлийн Сонгинохайрхан, Сүхбаатар, Хан-Уул дүүрэгт хүчтэй салхи шуурганд айлын гэр нурж, хашаа, байшингийн дээвэр хууларсан зэрэг дуудлагад холбогдох байгууллагууд хамтран хариу арга хэмжээ авчээ. Цаг уур, орчны шинжилгээний газраас 138 станцын мэдээгээр Монгол орны ихэнх нутгаар хуурайшлын зэрэг дундаас дээш түвшинд байна. Гангийн эрсдэлийн үнэлгээгээр Өвөрхангай, Баян-Өлгий, Өмнөговь, Ховд, Дорноговь аймгууд их эрсдэлтэйд, Увс, Завхан, Архангай, Говь-Алтай, Баянхонгор, Төв, Дорнод, Дундговь, Дархан, Сэлэнгэ, Хэнтий аймгууд дунд эрсдэлтэйд, Булган, Хөвсгөл, Орхон аймгууд бага эрсдэлтэйд тус тус үнэлэгджээ.

Иймээс Шадар сайд С.Амарсайхан дараах чиглэлийг өглөө. Үүнд:

• Ойн ашиглалт, цэвэрлэгээг үр дүнтэй зохион байгуулах бодлого гаргаж, эрх зүйн зохицуулалтыг сайжруулах,
• Байгаль, цаг уурын гаралтай аюулт үзэгдлээс урьдчилан сэргийлэх мэдээллийг тогтмол хүргэх, усны ослоос урьдчилан сэргийлэх арга хэмжээг эрчимжүүлэх,
• Гандуу нөхцөл байдлыг харгалзан өвөл, хаврын бэлтгэлийг аймаг, сум, өрхийн түвшинд хангах,
• Отор нүүдлийг оновчтой зохион байгуулах, малын халдварт өвчнөөс урьдчилан сэргийлэх,
• Өвс, тэжээлийн нөөцийг бүрдүүлж, зах зээл дээрх хомсдол, үнийн хөөрөгдлөөс сэргийлэх, мал, махыг эдийн засгийн эргэлтэд оруулж эрсдэлийг бууруулах,
• Орон нутгийн төсөвт гамшгийн эрсдэлийг бууруулахад шаардлагатай санхүүжилтийг тусгах.
• Төрийн байгууллагууд бүх шатандаа эртнээс бэлтгэл, бэлэн байдлаа хангаж, урьдчилан сэргийлэх арга хэмжээг тасралтгүй хэрэгжүүлэх шаардлагатайг Шадар сайд онцлон санууллаа.