Амралт зугаалгын улирал ид үргэлжилж буй энэ үед гол мөрөн, нуур цөөрмийн орчимд аялах иргэдийн тоо нэмэгдэж, үүний зэрэгцээ усны осол, эндэгдлийн тоо ч дагаад өсөх хандлагатай байна. Онцгой байдлын байгууллагын мэдээлснээр усны ослын гол шалтгаан нь:

• Бага насны хүүхдийг хараа хяналтгүй орхих,

• Согтууруулах ундаа хэрэглэсэн үедээ усанд орох,

• Зориулалтын бус хөвөгч хэрэгсэл (хийлдэг гудас, хөвөгч тоглоом) ашиглах зэрэгтэй шууд холбоотой ажээ.

ХИЙЛДЭГ ЗАВЬ МАШ АЮУЛТАЙ, ХЭДХЭН ХОРМЫН ДОТОР АМЬ ЭРСДЭХ БОЛОМЖТОЙ

      Мөн хэдэн жилийн өмнө ийм нэг үйл явдал болсныг эргэн сануулъя. Өгий нууранд хоёр охин аавын хамт хийлдэг завьтай явж байв. Гэтэл гэнэт салхи хүчтэй салхилж, завийг нуурын гүн хэсэг рүү эргүүлж орхижээ. Аав нь завиа эрэг рүү хамаг чадлаараа сэлүүрдсэн ч ямар ч үр дүн гарсангүй. Аврал эрж, ойр орчим дахь хүмүүс рүү “Авраарай” хэмээн гараа даллатал өнөөдүүл нь завь салхинд туугдан явааг мэдэлгүй, мэнд мэдэж байна хэмээн андууран, хариу даллан зогссон гэдэг. Азаар хийлдэг завь аюултай, салхи эргэхэд л хөмрөх эрсдэлтэйг мэдэх хашир эр үүнийг анзаарч, эргэн тойрны хүмүүстээ онцгой байдлын алба руу залгахыг сануулаад, өөрөө харин ойролцоох моторт завьтай хүнээс тусламж хүсэхээр явжээ. Завьчинд болсон явдлыг хэлэн гурвуул завиа асаан хийлдэг завийг хамгийн сүүлд харсан зүг рүү хамаг хурдаараа явлаа. Гэтэл тэр газар нь хэн ч, юу ч байсангүй. Нэгэнт хожимдож хэмээн бодож ахуйд завьчин “Тээр тэнд сүмийгээд, завь байх шиг байна” гэх зүгт харвал хийлдэг завь салхинд туугдсаар хэдийн нуурын голд хүрсэн байв. Аав охин гурав үнхэлцгээ хагартал айсан байдалтай, аав нь хэрэг бишидвэл хэмээн хоёр охиндоо аврах хантааз өмсүүлж, өөрөө хантаазгүй байж байсан гэдэг. Аврагчдыг хараад аав охин гурав бөөн баяр болж, өнөөх эр ч гурван хүний алтан амь аварчээ. Эндээс хийлдэг завь маш аюултай, салхи хүчтэй эргэвэл хэдхэн хормын дотор хүний амь эрсдэх боломжтой бэлхнээ харж болно.  

“Intex” хийлдэг завийг зөв, аюулгүй ашиглах зөвлөмж

Иргэдийн дунд өргөн хэрэглэгддэг “Intex” маркийн хийлдэг завь нь аврах хэрэгсэл биш, усны тээвэрлэлтэд зориулагдаагүй, зөвхөн эргийн хамгаалалт бүхий газарт буюу жижиг нуур, цөөрөм, гүехэн булан тохойд ашиглах зориулалттай гэдгийг онцлох нь зүйтэй. Завь ашиглах усны орчин нь:

• Салхины хурд 4 м/сек-ээс хэтрэхгүй,

• Давлагааны өндөр 0.3 м-ээс хэтрэхгүй байх шаардлагатай.

Анхаарах болон хориглох зүйлс:

• Хийлдэг завь нь аврах завь биш бөгөөд авралтын зориулалтаар ашиглаж болохгүй;

• Шумбалтад ашиглах, өөр тээврийн хэрэгслээр чирэхийг хориглоно;

• Завийг ашиглахаас өмнө гарын авлагатай сайтар танилцаж, аюулгүй ажиллагааны заавар мөрдөх;

• Завийг хийлсний дараа бүрэн бүтэн эсэхийг шалгах;

• Завины даацыг хэтрүүлэхгүй байх;

• Бүх зорчигч аврах хантаазтай байх ёстой;

• Завин дээр тэнцвэргүй байрлал үүсгэхгүйгээр зорчигчдыг жигд хуваарилан суулгах;

• Хөдөлгөөнд оролцох үед босох, суудал солих зэргээр тэнцвэр алдагдуулах үйлдэл хийхгүй байх;

• Завийг эзэнгүйгээр усны эрэг орчимд орхихгүй байх;

• Цоорсон, урагдсан завийг ашиглахгүй байх;

• Хурц үзүүртэй зүйл, химийн бодисын ойролцоо завийг байлгахгүй байх;

• Согтууруулах ундаа, мансууруулах бодис хэрэглэсэн үедээ завь жолоодохгүй байх;

• Цаг агаарын байдал гэнэт өөрчлөгдөх эрсдэлтэй тул завьтай аяллаа аль болох эрэгт ойрхон, богино хугацаанд хийх;

• Тухайн орон нутгийн захиргааны гаргасан зохицуулалт, шийдвэрүүдийг мөрдөх;

• Усан замын тээврийн тухай хууль болон холбогдох дүрэм журмыг баримтлах;

Аялал зугаалгын улирал бол амрах, байгальд амар тайван байх сайхан боломж хэдий ч болгоомжгүй нэг алхам аюул дагуулж болзошгүй. Иргэн бүр өөрийн болон бусдын амь нас, аюулгүй байдалд хариуцлагатай хандах үүрэгтэй. Хийлдэг завийг зөв ашигласнаар та гэр бүлийнхээ баярт аяллыг аюулгүй, мартагдашгүй болгож чадна.