Ирэх оны төсвийн төслийг төлөвлөх шатны үйл явцын талаар Сангийн сайд Б.Жавхлан мэдээлэл өглөө. Тэрбээр “Монгол Улсын 2026 оны төсвийг төлөвлөх ажил явагдаж байна. Тухайн жилийн төсвийг төлөвлөх ажил өмнөх жилийн төсөв батлагдах үед эхэлдэг. Жилийн дундуур буюу зургаан сарын 1-нд дараа жилийн төсвийн хүрээний мэдэгдлийг УИХ баталдаг. Үүнээс хойш дараа жилийн төсвийн төлөвлөлтийн оргил үе эхэлдэг. Сангийн яам бусад яамдаас ирсэн төсвийн саналуудыг нэгтгэж, боловсруулж, бодлогын хүрээнд хооронд нь угсрах шаардлагатай. Наймдугаар сарын 15-нд Засгийн газарт нэгдсэн байдлаар танилцуулж, есдүгээр сарын 1 хүртэл хэлэлцэж, өргөн барих дараалалтай. 2023 онд батлагдсан төсвийн ерөнхий хуульд наймдугаар сарын 15-аас өмнө Засгийн газарт хэлэлцүүлээд есдүгээр  сарын 1-нд өргөн барих хооронд олон нийтэд танилцуулах, салбар болгоноор хэлэлцүүлэх Засгийн газрын үүрэгтэй. Өнөөдөр ажлын цаг дуусах үеэр яамдаас төсвийн ерөнхийлөн захирагч нар төсвийн саналыг Сангийн яам руу хүргүүлэх үүрэгтэй. Нэг дэх өдөр яамдаас ирүүлсэн тоог нийтэд ил болгоно. Төсвөөс хасагдсан зардлыг буцааж тавих боломжгүй” гэв.