Олон улсын агаарын тээврийн үнэлгээний тэргүүлэгч байгууллага болох Их Британийн Лондонд төвтэй “Skytrax” компаниас 2025 онд хамгийн их ахиц дэвшил гаргасан дэлхийн арван агаарын тээвэрлэгчийн жагсаалтыг зарлалаа. Энэхүү жагсаалтыг Тайванийн “Starlux” компани тэргүүлсэн бол дараагаар нь Италийн “ITA Airways”, Хонгконгийн “HK Express”, Германы “Eurowings” зэрэг томоохон агаарын тээвэрлэгч багтжээ. Харин Монголын үндэсний агаарын тээвэрлэгч МИАТ ТӨХК уг жагсаалтын долдугаар байрт бичигдсэн байна. Skytrax-ийн тайланд дурдсанаар МИАТ компанийн сүүлийн жилүүдэд гаргасан томоохон өөрчлөлт, шинэчлэлийн үр дүнд ийм өндөр үнэлгээ авчээ.

Тухайлбал, Боеинг 787-9 загварын агаарын хөлгөөр паркаа өргөжүүлж, Истанбул, Франкфурт зэрэг холын зайн чиглэлүүдэд тав тухтай, шууд нислэг үйлдэх боломжийг бүрдүүлсэн нь ихээхэн ахиц дэвшил гэж онцолсон байна. Мөн орон нутгийн болон олон улсын нислэгийн давтамж, цар хүрээгээ нэмэгдүүлж, хурдацтай өргөжүүлж буйг үнэлжээ.