Хүчтэй аадар борооны улмаас Төв аймгийн Аргалант суманд долоон айлын гэр, Баянхангай суманд 36 айл, Лүн суманд 13 айл, Эрдэнэсант суманд хоёр айлын гэр нурж, нийт 58 айлын гэр, 13 хашаа сүйдэж, 16 автомашины салхины шил хагарсан байна. Харин Сүхбаатар дүүрэгт нэг, Сонгинохайрхан дүүрэгт дөрвөн байшингийн дээвэр хууларч, нурсан. Мөн Сонгинохайрхан дүүрэгт 28, Чингэлтэйд нэг, Хан-Уул дүүрэгт хоёр, нийт 31 айлын гэр нурсан бөгөөд нэг иргэн гэртээ дарагдсан тухай дуудлага Онцгой байдлын албанд ирсэн байна. Сонгинохайрсан дүүргийн 25 хорооны иргэн Г.Оюунцэцэгээс үүсэн нөхцөл байдлын талаар тодрууллаа.

    Тэрбээр “Өчигдөр 23:00 цагийн үед цахилгаан цахиж, 30 минут аадар бороо орсон. Хүчтэй салхи, борооны улмаас байшингийн цонх хагарч, дээвэр хууларч, нэг талын хана нурсан. Тухайн үед гурвуулаа гэртээ байсан учир дээвэр нурахад маш их айж, сандарсан. Онцгой байдлын албанд дуудлага өгтөл "Одоо очоод яах вэ, манайх тусламжийн байгууллага биш" гэх тайлбар өгсөн. Тэгээд Онцгой байдлынхан 01:00 цагийн үед манайд ирсэн. Тэд манай байшингийн нурсан хана, хагарсан цонх, хууларсан дээврийн зургуудыг аваад "Энэ өөрсдийн чинь барьсан байшин, бид тусламжийн байгууллага биш" гэсэн. Дараа нь хороондоо хандахад “ОБЕГ-т хандаж дүгнэлт гаргуулаарай” гэсэн.  Бид ямар дүгнэлт яаж гаргуулахыг ойлгоогүй. Манай энэ хавийн олон айлын хүлэмж, гэр нурсан. Манай байшингаас гадна нэг талын хана, амбаар, био нойл, хашаа бүхэлдээ нурсан. Зарим айлын блокон хашаа нурж, дээврүүд хууларсан байдалтай байна” гэв.