Өнөөдөр  БНСУ-ын Санхүүгийн гэмт хэрэгтэй тэмцэх газраас прокурорын зөвшөөрөлтэйгөөр дэлхийд алдартай K‑pop продакшн HYBE компанийн төв байранд нэгжлэг явуулж, барилга байгууламжийг битүүмжилжээ. Энэхүү ажиллагаа нь HYBE компанийн үүсгэн байгуулагч, ТУЗ-ийн дарга Bang Si Hyuk-той холбогдуулан явуулж буй мөрдөн шалгах ажиллагааны хүрээнд хийгдэж байгаа юм. Түүнийг компанийн санхүүгийн урсгал, хөрөнгийн шилжүүлэг, татварын тайлан зэрэгт зөрчил гаргасан байж болзошгүй гэх хардлагатайгаар шалгаж эхэлсэн талаар БНСУ-ын Yonhap News Agency, Korea Herald зэрэг хэвлэлүүд мэдээлсэн байна. Мөрдөн шалгах ажиллагааны хүрээнд санхүүгийн баримт бичиг, гэрээ хэлцэл, цахим мэдээллийн сан болон хөрөнгө оруулалтын баримтуудыг хураан авч, шаардлагатай материалыг битүүмжилсэн гэж албаныхан мэдээлжээ.

HYBE компани BTS, NewJeans, SEVENTEEN зэрэг олон улсын түвшинд алдартай уран бүтээлчдийг төлөөлдөг томоохон агентлаг бөгөөд уг ажиллагаа дэлхийн хэвлэл мэдээллийн анхаарлыг ихээр татаж байна. Одоогоор компанийн зүгээс албан ёсны тайлбар хийгээгүй бөгөөд мөрдөн шалгах ажиллагаа үргэлжилж байна.

Эх сурвалж: https://www.reuters.com/business/media-telecom/south-korea-police-raid-offices-k-pop-powerhouse-hybe-over-share-probe-2025-07-24/