Нийгмийн даатгалын үндэсний зөвлөл долдугаар сарын 23-нд ээлжит хурлаараа дөрвөн тогтоолын төсөл, хоёр танилцуулгыг хэлэлцлээ.

Хуралдаанаар нэрийн дансны 2024 оны орлогод тооцох жилийн хүүгийн хэмжээг 11.34 хувиар тогтоохоор шийдвэрлэсэн байна.  Мөн нас барсан даатгуулагчийн ар гэрт олгох тэтгэмжийн хэмжээг шинэчлэн тогтоожээ.

Тодруулбал,  нас барсан даатгуулагчийн ар гэрийн гишүүнд гурван сая төгрөг, харин амьгүй донор болж эд, эс, эрхтнээ бусдад шилжүүлсэн тохиолдолд даатгуулагчийн ар гэрийнхэнд 4.5 сая төгрөг болгон нэмж тэтгэмж олгохоор тогтоожээ.

Үүнээс гадна үйлдвэрлэлийн осол, мэргэжлээс шалтгаалсан өвчний даатгалын сангаас сэргээн засах болон сувиллын тусламж үйлчилгээний төлбөрийг нэг ор хоногт 110 мянган  төгрөгөөр шинэчлэн тогтоох шийдвэрийг гаргасан байна.