Манай улс энэ онд говийн баавгайг хамгаалах чиглэлээр гурван зорилт бүхий 21 ажил хэрэгжүүлэхээр төлөвлөжээ. Байгаль орчин, уур амьсгалын өөрчлөлтийн яам, МУИС болон “Говийн гайхамшигт амьтад” төрийн бус байгууллага хамтран “Мазаалай баавгайн хамгаалал, судалгаа” сэдэвт олон улсын хурлыг зохион байгууллаа. Судлаачдын мэдээлснээр мазаалайн гол тархац нутаг болох Говийн их дархан цаазат газар нь нийтдээ 4.6 сая га. Гэвч сансрын дохиололтой хүзүүвч ашигласан судалгаагаар уг газрын 18,000 ам км орчимд л мазаалай үлдсэн нь тогтоогджээ. Судлаач А.Баясгалан "Мазаалайн тархац нутаг 80 хувиар хумигдсан" гэв. Говийн их дархан цаазат газрын Хамгаалалтын захиргааны дарга Ч.Баярбат "Говийн баавгайн амьдрах орчныг сайжруулах долоон ажлыг 269 сая төгрөгийн санхүүжилтээр хэрэгжүүлж эхэлсэн" гэлээ. 

2017 оны тооллогоор Монголд 32 бодгаль мазаалай бүртгэгдсэн бол Монгол, Хятадын хамтарсан төслийн багийнхан 52 бодгаль гэж тооцсон байна. Энэ талаарх судалгааны ажлыг хэвлүүлэхээр төлөвлөж буйгаа мэргэжилтнүүд дурдлаа.