Улаанбаатар хотын түгжрэлийг бууруулах томоохон бүтээн байгуулалт болох Налайхын тойргоос Эмээлтийн уулзвар хүртэлх зургаан эгнээ бүхий 32 км хурдны замыг нийт 1.9 их наядаар барих ажлыг эхлүүлэхээр болж, өнөөдөр тус замын тендерт шалгарсан аж ахуй нэгжүүдийг албан ёсоор зарлаж, гэрээ байгуулах эрх олгох мэдэгдлийг хүргүүллээ. Энэхүү хурдны замын энэ оны санхүүжилт 538 тэрбум төгрөгийг орон нутгийн төсвөөс гаргана. Төсөл нь долоон багц ажилтай бөгөөд эдгээрт газар шорооны ажил, хиймэл байгууламж, авто замын дагуух үерийн хамгаалалтын далан, гэрэлтүүлэг, цахилгаан хангамжийн дэд станц шилжүүлэх болон шинээр барих, мэдээлэл холбооны төлөвлөлт, археологи, палеонтологи, түүх угсаатны судалгаа, авран хамгаалах малтлагын ажил, байгаль орчны хамгаалалт зэрэг багтсан байна. Төслийн хүрээнд долоон түвшний орц, гарцын огтлолцол, 10,000 метр орчим гүүр, долоон туннель баригдах бөгөөд автомашины зорчих хэсгийн өргөн нь 12.5 метр, хурдны хязгаар 100 км/цагтай байх юм. Тус хурдны зам баригдсанаар Улаанбаатар хотын авто замын түгжрэлийг эрс бууруулах, тээвэр ложистикийг сайжруулах, орон нутгийн хөгжилд чухал түлхэц болохоор байна.