ОБЕГ-аас ой, хээрийн түймрийн нөхцөл байдлын талаар танилцуулж байна. Энэ үеэр УОК-ын нарийн бичгийн дарга, хурандаа Т.Баярхүү мэдээлэл өглөө.

        Тэрбээр “Энэ жилийн цас бага орсон, нийт нутгаар хуурайшилт ихтэй байгаатай холбоотойгоор шар өвс, ой хээрийн түймрийн дуудлага олон бүртгэгдэж байна. Өнөөдрийн байдлаар 12 аймгийн 52 сум, нийслэлийн хоёр дүүрэгт нийт 76 удаагийн ой хээрийн түймэр бүртгэгдсэн байна. Өнгөрсөн жилийн мөн үетэй харьцуулбал 40.7 хувь, таван жилийн дунджаар 38 хувь өссөн үзүүлэлтэй байна. Нийт бүртгэгдсэн ой хээрийн түймрийн 70 орчим хувь нь ил задгай орхисон гал, тамхины цог, үнс, машины яндангийн цог зэргээс гарсан гэдэг нь тогтоогдсон. Өчигдөр буюу дөрөвдүгээр сарын 28-ний өдөр таван гал түймрийн дуудлага бүртгэгдсэн. Сэлэнгэ аймгийн Зүүнбүрэн, Цагаан нуур, Хэнтий аймгийн Батширээт, Дорноговь аймгийн Иххэт, Улаанбаатар хотын Хан-Уул дүүрэгт Богд ууланд түймрийн дуудлага ирсэн. Хэнтий аймгийн Батширээт, Дорноговь аймгийн Иххэт суманд гарсан түймрийг бүрэн унтраасан. Богд ууланд гарсан түймрийг унтраах ажиллагааг зохион байгуулж байна. Ер нь бүрэн унтраасан гэж ойлгож болно. Холбогдох мэргэжлийн байгуулга түймрийн голомтод шалгах ажиллагаа явуулж байгаа. Одоогийн байдлаар Сэлэнгэ аймгийн Зүүнбүрэн, Цагаан нуур суманд гарсан түймрийг унтраахаар ажиллаж байна. Дархан, Эрдэнэт, Сэлэнгэ тэргүүтэй ойролцоо аймгийн Онцгой байдлын байгууллага, сумын мэргэжлийн анги, сайн дурын бүлгүүд ажиллаж байсан бол нэмэлтээр үндэсний аврах багийн 30 хүнтэй гурван бүлэг очсон. Булган аймгийн Хангал суманд дөрөвдүгээр сарын 26-нд гарсан түймрийн цурамд оруулсан. Цурмыг манаж бүрэн унтраах ажлыг хийж байна. Зүүнбүрэн суманд гарсан түймрийн үеэр дөрвөн гэр, 10 өвөлжөөний хашаа, нэг трактор шатсан гэсэн урьдчилсан дүгнэлт гарсан. Ойрын өдрүүдэд хүчтэй салхи шуургатай өдрүүд үргэлжлэх тул ОБЕГ-аас гаргасан зөвлөмжийн дагуу ой хээрийн түймрээс урьдчилан сэргийлнэ үү.