“Эрдэнэс Тавантолгой” ХК-ийн Бүрэн эрхт төлөөлөгч Ж.Ганбат өнөөдөр нүүрсний зах зээл, экспорт болон цаг үеийн асуудлаар сэтгүүлчдэд мэдээлэл өглөө.

                    2023 оны эхний таван сарын байдлаар “Эрдэнэс Тавантолгой” ХК нийт 11 сая тонн нүүрс экспортолж, Монгол Улсын энэ оны эхний таван сард экспортолсон нийт нүүрсний 43 хувийг бүрдүүлжээ. Оны эхний дөрвөн сарын байдлаар БНХАУ нийт 31.1 сая тонн нүүрс экспортолсны 49 хувийг Монголын коксжих нүүрс эзэлж байгаагаас 43 орчим хувийг нь “Эрдэнэс Тавантолгой” ХК экспортолсон байна. Улмаар тус компани нүүрсний экспортоос улс, орон нутгийн төсөвт 1.06 их наяд төгрөгийн татвар, хураамж төвлөрүүлээд байгаа аж. Мөн “Эрдэнэс Тавантолгой” ХК энэ онд экспортын нүүрсний тоо хэмжээгээ 30 сая тоннд хүргэхээр зорьж байгаа” талаар тус компанийн Бүрэн эрхт төлөөлөгч Ж.Ганбат онцлов.

Ташрамд дурдахад, “Эрдэнэс Тавантолгой” ХК-ийн оны эхний таван сард төсөвт төвлөрүүлсэн хураамж “Эрдэнэт үйлдвэр” ТӨҮГ, “Оюу толгой” ХХК-ийнхаас даруй их байна. Тухайлбал, “Эрдэнэт үйлдвэр” оны эхний таван сард 697 тэрбум төгрөг, “Оюу толгой” 236 тэрбум төгрөг төлсөн бол “Эрдэнэс Тавантолгой” ХК дангаараа 1.06 их наяд төгрөгийн татвар төлөөд байгаа аж.