Хэнтий аймгийн Баянхутаг суманд 2021 онд 40 хүүхдийн дотуур байр барихаар тендер зарласан боловч өнөөдрийг хүртэл барилгын ажил дуусаагүй байгаа аж. Тиймээс орон нутгийн иргэд тус стандартын шаардлага хангаагүй, чанаргүй байр барьж байна гэх мэт гомдолтой байгаа аж. Энэ талаар тус сумын Засаг даргаас тодрууллаа.

    Тэрбээр “Мана гал” констракшн 2021 онд манай суманд 40 хүүхдийн дотуур байр барихаар тендерт шалгарсан юм билээ. Тус тендерийг Төрийн худалдан авах ажиллагааны газраас зарласан байсан. Дотуур байрыг 2021 онд барьж дуусгахаар Боловсрол соёл шинжлэх ухааны яамтай гэрээ байгуулсан боловч өнөөдрийг хүртэл барьж дуусаагүй байна. Тиймээс тус гэрээг цуцлуулж, барилгыг нурааж, дараагийн арга хэмжээг авахаар ярилцаж байгаа. Уг нь улсын төсвийн 829 сая төгрөгөөр барина гэж шалгарсан юм билээ. Хэрвээ гэрээ цуцлагдвал дахин тендер зарлаж, сонгон шалгаруулалт зарлах байх. Бид үүнд оролцох боломжгүй. Зөвхөн хөндлөнгийн хяналт тавих үүрэгтэй ажилладаг. Олон нийтийн сүлжээгээр цацагдсан зураг бол тус байрыг нурааж байгаа үеийн зураг. Байрны гадна талыг хуулсан” гэлээ.