“Мөн зөв” ХХК-ийн тусгай зөвшөөрлөөр оруулж ирдэг ахуйн газыг хуурамчаар үйлдвэрлэж, нууцаар зардаг байж болзошгүй хэрэг өнгөрсөн долоо хоногт илэрсэн. Тодруулбал, өнгөрсөн долоо хоногт хэрэглэх заавар, хаяг нь тодорхойгүй 100 гаруй хайрцаг ахуйн газыг карго ачаанд нууж, хилээр оруулж ирээд Увс аймаг руу тээвэрлэхээр завдсан үед нь “Мөн зөв” ХХК-ийн ажилтнууд газар дээр нь илрүүлсэн байдаг. Харин тус зөрчлийг хэрхэн хянаж, шалгаж байгаа талаар Хотын стандарт, хяналтын газрын Газрын тос, хийн хяналтын улсын ахлах байцаагч Т.Мөнхболдоос тодрууллаа.

    Тэрбээр “Өнгөрсөн долоо хоногт хууль бусаар стандарын шаардлага хангаагүй ахуйн газын Увс аймаг руу тээвэрлэж байхад нь “Мөн зөв” ХХК-ийн илрүүлж, Баянзүрх дүүргийн цагдаагийн газраас шалгалтын ажиллагааг үргэлжүүлж, 100 гаруй хайрцаг барааг битүүмжилсэн. Манайд тусгай бодис хадгалах агуулах байхгүй учир ГЕГ-ынханд хүлээлгэж өгөхөөр ярилцаж байгаа. Учир нь манай улсын урд хилээр тэсэрч, дэлбэрэх аюултай ахуйн газ  оруулж ирэхийг хориглосон байтал, хяналтгүй газ орж ирсэн байгаа юм. Мөн газыг дуураймал буюу стандартын шаардлага хангасан эсэхийг шалгах лаборатори байхгүй. Хийг химийн тусгай аргаар шинжилж тогтоодог. Химийн хүрээлэн, Ашигт малтмал, Газрын тосны газар, ГЕГ-ын алинд нь ч ахуйн газыг шинжлэх лаборатори байхгүй учир дээрх хэрэг гацсан байдалтай байна. Би тус хэргийг хуулийн хүрээнд хариуцаж ажиллах ёсгүй. МХЕГ-ыг татан буулгахаас өмнө энэ төрлийн асуудлыг хариуцдаг байсан юм. Тиймээс өнөөгийн хариуцаж ажиллаж, байгаа хүмүүст зөвлөгөө өгч байгаа” гэсэн юм.