“Чингис хаан” хаад язгууртны музей өнөөдөр нээлтээ хийлээ. Энэ үеэр Ерөнхийлөгчийн зарлигаар  Төрийн есөн хөлт цагаан тугийг Төрийн ордноос гаргаж,  музейд заллаа. Нээлтийн ёслолын үеэр “Чингис хаан” музейн захирал академич С.Чулуун үг хэллээ.

Тэрбээр “2019 оны долдугаар сарын 3-ны өдөр тухайн үеийн Монгол Улсын Ерөнхий сайд У.Хүрэлсүхийн санаачилгаар “Чингис хаан” хаад язгууртны музейг байгуулах  түүхэн шийдвэр гарсан цагаас хойш гурван намрыг үдэж, өнөөдөр өргөн олон түмэндээ өв соёлынхоо дээжийг дэлгэн үзүүлэхэд бэлэн боллоо. Монголын уудам тал нутагт мэндэлсэн талын баатрын хөвгүүн, хүнд бэрхийг туулан ертөнцийг  тохинуулж, амар амгаланг энхжүүлэн, ёст  төрийн голомтыг бадрааж, өнө мөнхөд орших агуу түүхийг бүтээж, хүмүүн төрөлхтөнд оньсого мэт нууцлаг, уул мэт сүрлэг, мөрөн мэт хүчирхэг амьдарсан хүмүүнийг Чингис хаан хэмээн дэлхий хүндлэн биширдэг. Тэрээр эртний төрийн хэлхээг түүчээлж, энгүй хүчирхэг эзэнт улсыг байгуулж, энх мөнхөд үлдэх удам хойчдоо шүтэгдэж, төрийн ёс, цэргийн ёсны эрдэмд төгс боловсорсон  хаадын хаан 1000 жилд ганц мэндлэх суу билигт хүмүүн билээ. Та бидний үнэт зүйл зүрх сэтгэлийн минь шүтээн их эзэн Чингис хааныхаа суу алдрыг бахархан дурсаж, сурталчлан таниулж, бишрэн дээдлэх, соён гэгээрлийн их өргөөний нээлтэд хуран цугларсанд баяртай байна. “Чингис  хаан” музей нь монголчуудын анхны төрт улс Хүннүгээс эхлэн  их эзэн хаадын байгуулж, хоёр зууныг эрхшээсэн хүчирхэг эзэнт гүрэн, эвлэрэл хагарал, эрхшээл бэрхшээлийг  туулж, эцэг өвгөдийн үлдээсэн Монгол Улсаа эрхэмлэн хорьдугаар зууны эхэн үед цөхрөлтгүй тэмцэл, уйгагүй зүтгэл, цуцашгүй итгэлийн үрээр боломжгүйг давж, туурга тусгаар  эртний түүхт энэ улсыг минь үлдээж өгсөн бүхий л хаад язгууртны бүрэн түүхийг тольдон үзүүлнэ. “Чингис хаан” музейн бүтээн байгуулалт нь дэлхий дахиныг хамарсан цар тахлын хүнд бэрх цаг, бүтээлгэхгүйн төлөөх бодол сэтгэлтэн тэргүүтнийг ажралгүй туулж, улсынхаа сан хөмрөгөөс хөрөнгө мөнгийг харамгүй гаргаж монголын барилгачид, эрдэмтэн судлаачид, уран бүтээлчдийн уйгагүй хөдөлмөрөөр, чин бишрэлт эцэг өвгөдөө хүндлэн, их хаанаа сүслэн дээдэлж хамтран ажиллаа. “Чингис хаан” музей нь Монгол Улсын төрөөс нийгэм, соёлын салбарт сүүлийн 30 жилд хийгдэж буй хамгийн том бүтээн байгуулалт юм. Монгол Улсын санхүүжилт, монголын архитектурын ур ухаан, монгол эрдэмтдийн мэдлэг чадвар, монгол залуусын хүсэл тэмүүллийн үр дүнд Ази тивдээ эхний аравт багтах хэмжээтэй үзмэрийнхээ  эзлэх хувиар тэргүүлж, аюулгүй байдал дохиолол хяналт, сан хөмрөг хамгаалалтын хамгийн орчин үеийн шийдэлтэй, мэргэжлийн боловсон хүчээр бүрэн хангаж бүтээлээ” гэв.