Монгол Улсын Хөдөлмөрийн баатар, Ардын уран зохиолч, Соёлын гавьяат зүтгэлтэн, зохиолч Бөхийн Баастын мэндэлсний 100, 101 жилийн ойд зориулж, түүний 1959-2019 онд амьдарч байсан нийслэлийн Чингэлтэй дүүргийн нэгдүгээр хороо, 22 дугаар байрны хананд дурсгалын самбар байрлуулах ёслол энэ сарын 7-нд болжээ. Мөн тус өдөр “MN” арт галларейд Бөхийн Бааст зохиолчийн 1956-1980 онд авсан баримтат гэрэл зургуудыг багтаасан “Ус хаа ч адилхан”, “Үзгээр бичээгүй тэмдэглэлүүд I”, “Бидэнд даарах зав байсангүй”, “Үзгээр бичээгүй тэмдэглэлүүд II” номын нээлт болж, уг номд орсон гэрэл зураг болон нэрт зохиолчийн бусад архив, үзэсгэлэнг дэлгэжээ.

Тус гэрэл зургийн үзэсгэлэн “MN” арт галларейд энэ сарын 16-ныг дуустал олон нийтийн хүртээл болох юм байна.

      Нэрт зохиолч Бөхийн Бааст 1921 онд Баян-Өлгий аймгийн Алтанцөгц суманд төрсөн, "Алтай хөх дөнөн", "Дөрвөн туужийн Бор" зэрэг олон зохиол бүтээл туурвисан, XX зууны ихэнх үе, XXI зууны эхэн үеийн Монголын уран зохиолын амьд гэрч, үнэт архив болсон уран бүтээлч байв. Тэрбээр 2019 онд ертөнцийн мөнх бусыг үзүүлсэн юм.