Өсвөрийн зохион бүтээгчдийн лаборатори ахлах сургуулийн биеийн тамирын багш н.Нямсүрэн есдүгээр сарын 30-нд согтууруулах ундааны зүйл хэрэглэсэн үедээ арваннэгдүгээр ангийн сурагчийг зодсон гэх мэдээлэл гарсан. Тодруулбал, тус сургуулийн биеийн тамирын багш н.Нямсүрэн согтуурсан үедээ сурагчаа зодож, хамар, чихыг нь гэмтээсэн хэрэг гарчээ. Сурагчаа зодсон багшид ямар арга хэмжээ авсан талаар тус сургуулийн сургалтын менежер Г.Энхтогоогоос тодрууллаа.

     Тэрбээр “Манай сургуулийн биеийн тамирын багш арваннэгдүгээр ангийн сурагчаа зодсон нь үнэн.  Биеийн тамирын багш тус сурагчийг электрон тамхи хэрэглэсэн байна хэмээн хоёр удаа алгадсан гэсэн. Гэвч тус сурагч электрон тамхи хэрэглээгүй мөртөө “Би хэрэглэсэн,  найзууддаа өгсөн” хэмээн  бусдын хэргийг хүлээсэн хэрэг гарсан байсан. Одоогоор сурагчийн биеийн байдал хэвийн. Хамар, чихний ямар нэгэн эмчилгээ хийлгээгүй. Биеийн тамирын багш болон сургуулийн удирдлага, хамт олны зүгээс сурагчийн гэр бүлийнхэнтэй уулзсан. Тус сурагчийн эцэг, эх багшид ямар нэгэн арга хэмжээ авах шаардлагагүй, бид гомдолгүй гэсэн. Тиймээс биеийн тамирын багш ажлаа үргэлжүүлэн хийж байгаа” гэсэн юм.