Орхон аймгийн төвд, тоглоомын талбайн хажууд нохой буудаж, устгаж байгаа бичлэг олон нийтийн сүлжээгээр цацагдаж, олны шүүмжлэлийг хүртсэн. Хот, аймаг, сумын төвд нохой устгахын тулд ямар журам, шаардлага тавьдаг талаар Орхон аймгийн Хот тохижуулах газрын Ерөнхий инженер Н.Эрдэнэбаатараас тодрууллаа. Тэрбээр “Аймгийн төвд нохой устгахын тулд Цагдаагийн газар албан бичиг хүргүүлж, цагдаагийн хяналтан дор устгал хийдэг. Нохой устгалын ажилд жолооч, нохой чирэгч, анчин нар хяналтын цагдаатай хамт явдаг. Цагдаа орчныг аюулгүй болгосны дараа буюу 30-40 метрыг хамгаалтанд авсаны дараа устгал хийдэг. Тиймээс устгалынхан орчныг аюулгүй болгосны дараа тоглоомын талбайн хажууд нохой устгасан гэсэн үг. Харин гэр хорооллын нохой устгалын ажлыг багийн даргын ажлын алба, хэсгийн цагдаатай хамтран  хийдэг. Манай аймаг жилд 4000-6000 нохой устгадаг. Одоогийн байдлаар нохой устгалын ажил үргэлжилж байна” гэв.