Цахим орчинд тав болон 11 настай хоёр хүүг Nissan Тiidaа загварын машинын жолооч мөргөж байгаа дүрс бичлэг цацагдсан билээ. Тус осол өчигдөр болсон бөгөөд 11 настай хүү багшийнхаа хүүхдийг цэцэрлэгт хүргэж өгөх гэж яваад осолджээ. Бид 11 настай хүүгийн ээж Н.Энхчимэгтэй холбогдож, ослын талаар тодрууллаа. Тэрбээр “Камерийн бичлэг үзэхэд, хүү маань мөргүүлсэн ч сандрахдаа босож, нөгөө хүүг машин доороос татаж гаргасан байгаа юм. Хамгийн гол нь ойр орчимд нь байсан хүмүүс таван настай хүүхдийг эмнэлэгт хүргээд, миний хүүг орхиод явсан байна лээ. Үүнд би гомдолтой байгаа. Би хяналтын камерны бичлэг үзээд, хүүгээ мөргүүлснийг мэдсэн. Хүүхдээ хүргүүлэхээр явуулсан багшийг  нь буруутгахгүй байна, хүний амьдрал шүү дээ. Хүүхдүүд дүрмээрээ зам гарч байхад машин зогсож өгөх хэмжээний ухамсаргүй хүмүүс  одоо хүртэл байдаг юм байна. Мөн хоёр хүүхэд мөргүүлчихээд байхад нэгийг нь орхиод явсанд гомдолтой байна" гэв.