“Төсөв-2023” олон нийтийн нээлттэй хэлэлцүүлэг анх удаа зохион байгуулах гэж байна. Хэлэлцүүлгийг хэрхэн зохион байгуулах талаар УИХ-ын гишүүн, төсвийн Байнгын хорооны дарга Г.Тэмүүлэн мэдээлэл хийлээ.

Тэрбээр “Монгол Улсын их хурал 2023 оны төсвийг хэлэлцэж эхэллээ. Төсөв намрын чуулганаар хэлэлцэн батлагдах ёстой. 2023 оны төсөв хэд хэдэн онцлогтой. 2022 оны төсөв бол цар тахлын хямралыг даван туулах, эрсдэлийг давж гарах төсөв байсан. Харин ирэх оны төсөвд эдийн засгийг тогтворжуулах, шинэчлэлийг үргэлжлүүлнэ. Төсвийн Байнгын хорооны зүгээс хаалттай хаалганы цаана төсөв баталдаг жишгийг өөрчилж, олон нийтээрээ төсвийг хэлэлцдэг байдлыг бий болгохыг зорьсон. Энэхүү ажлын хүрээнд аравдугаар сарын 19-нд Улсын Их Хурал анх удаа олон нийтийн хяналт дор төсвийн асуудал хэлэлцэнэ. Төсөв бол татвар төлөгчдийн мөнгө. Тиймээс төсвийн мөнгийг хэрхэн зохицуулж байгаад иргэд хяналт тавих хэрэгтэй. Цаашид төсвийн хоёрдугаар хэлэлцүүлэг буюу бүх зүйл эцэслэн батлагдахаас өмнө олон нийтийн нээлттэй хэлэлцүүлэг хийдэг байх  жишиг тогтооё. Төсөв батлагдахаас мөн иргэд санал бодлоо хүргүүлэх боломжийг бүрдүүлнэ. “Төсөв-2023” хэлэлцүүлэгтэй уялдуулан өнөөдрөөс аравдугаар сарын 17-ныг хүртэл иргэдээс санал авна” гэв.