Дархан-Уул аймгийн Эмэгтэйчүүдийн холбооны дэргэдэх Бизнес Эрхлэгч эмэгтэйчүүдийн зөвлөлөөс санаачлан “Бизнесийн салбарт эмэгтэйчүүдийн оролцоог дэмжих нь” сэдэвт уулзалт хэлэлцүүлгийг өнөөдөр /2022.09.29/ Эмэгтэйчүүдийн ордонд зохион байгууллаа. Тус уулзалтад АНУ-ын алдарт Цахиурын хөндийн хөрөнгө оруулагч Река Пай Камат оролцож өөрийн амжилтын түүх, бизнесийн туршлагаасаа бизнес эрхлэгчдэд хуваалцсан юм.

    Рекха Пай нь нөлөөлөгч, “Angel” хөрөнгө оруулагч ба Kamath Family Foundation байгууллагыг удирдан ажиллуулдаг байна. Цахиурын хөндийд Нийгэмд чиглэсэн венчур сангийн түнш, түүний удирдах зөвлөлийн гишүүн бөгөөд хөрөнгө оруулалтын эхэн үеийн судалгааны ажлыг удирдан ажиллуулахын зэрэгцээ Массачусетсийн Технологийн Их Сургуулийн ” Ай-Коор Спарк” (I-Corps Spark) хөтөлбөрт гэрээт зааварлагчаар ажилладаг аж.

  Рекха өмнө нь StartX-д ажиллаж байж. Харин одоо Стэнфордын дэргэдэх Лийн Лончпад хөтөлбөрийн “Станфордын анжел ба энтерпренерүүд” (Stanford Angels and Entrepreneurs (SA&E) хэмээх байгууллагад хэд хэдэн стартапуудад хөрөнгө оруулж, сүүлийн 20 гаруй жил компаниудад бүтээгдэхүүний менежмент, маркетинг, бүтээгдэхүүний хөгжүүлэлт зэрэг чиглэлээр ментор, зөвлөх үйлчилгээ үзүүлж, Techwomen хөтөлбөрийн мэргэжлийн ментор болон нөлөөлөгч зөвлөхөөр ажиллаж байгаа ажээ.