БНХАУ-ын Шямэнь хотод болсон 3х3 сагсан бөмбөгийн Оюутны дэлхийн аварга шалгаруулах тэмцээнд манай улсаас гавьяат дасгалжуулагч С.Тулгын удирдлага дор оролцсон “Мон-Алтиус” дээд сургуулийн баг хүрэл медаль хүртсэн билээ. Ингээд шигшээ багийн тамирчин А.Батхуягтай ярилцсанаа хүргэж байна.

-Оюутны ДАШТ-д хүрэл медаль хүртсэнд баяр хүргэе. Сэтгэгдлээсээ хуваалцахгүй юу?

-Баярлалаа, Дэлхийн аварга шалгаруулах тэмцээнээс хүрэл медаль хүртсэндээ баяртай байна. Одоогийн байдлаар миний хүртсэн хамгийн том медаль болоод байгаа.

-Эх орноо төлөөлж шигшээ багт тоглох ямар байсан бэ. Тоглолтын үеийн мэдрэмжээсээ хуваалцаж болох уу?

-Эх орноо төлөөлөн шигшээ багт багтаж тоглоно гэдэг тамирчин бүрийн мөрөөдөл. Аваргын төлөөх тоглолт дээр хожвол алтан медалийн төлөө, хожигдвол хүрэл медалийн төлөө тоглох байсан. Хүрэл медалийн төлөөх тоглолт дээр биеийн ядралт их байсан ч заавал медаль хүртэх ёстой гэсэн бодолтойгоор тоглож, Хятадын багийг ялсан. Бие хэдий ядарсан байсан ч ялахын төлөөх дуусашгүй их энерги гарсаар л байсан.

-Тамирчинд бэлтгэл хамгийн чухал байдаг шүү дээ. Бэлтгэлдээ хэрхэн анхаардаг вэ?

-Бэлтгэл бүр дээрээ өөрийгөө 100 хувь дайчлахыг хүсдэг дээ.

-Хүрэл медалийн төлөөх тоглолт ямар байсан бэ. Медаль авах зорилгодоо хүрлээ шүү дээ. Тухайн тоглолтын талаар яривал?

-Хүрэл медалийн төлөөх тэмцээн ээлж дараалан оноо авч, өгсөн тоглолт болсон. Сүүлийн мөчид л шийдвэрлэгдсэн. Өмнө нь Азийн аварга шалгаруулах тэмцээнд тус хятадын багтай аваргын төлөө тоглоод ялагдаж байсан юм билээ. Тэр үед чадаагүйгээ гүйцээсэн юм шиг санагдсан даа.

-Монгол Улсын шигээ багт хэдэн насандаа ямар тэмцээний дараа дуудагдсан бэ. Тэр үед ямар мэдрэмж авч байв?

-U16 насны Улсын аварга шалгаруулах тэмцээнд манай баг ялж, би тэмцээний шилдэг тоглогч болсон. Тус тэмцээний дараа улсынхаа шигшээ багт дуудагдаж, эх орноо төлөөлөх тамирчин болсон. Миний амьдралдаа мэдэрсэн хамгийн сайхан зүйлсийн нэг байсан даа.

-Сагсан бөмбөгийн спортоор хэзээнээс, яагаад хичээллэж эхэлсэн бэ. Юу нь таны сонирхлыг татав?

-Сагсан бөмбөгийн спортоор тууштай хичээллээд долоон жил болж байна. Тэрнээс өмнө байрныхаа гадаа, зааландаа тоглодог, сагсан бөмбөгт сонирхолтой хүүхэд байлаа. Бөмбөг оруулах мэдрэмж ялж, ялагдах, шантрах, баярлах гээд олон мэдрэмжүүдийг сагсан бөмбөгийн спортоос л мэдрэх дуртай. Үргэлж сайжирсаар байхыг хүсдэг дээ.

-3х3 сагсан бөмбөгийн онцлогийн талаар ярихгүй  юу. Таны хувьд ямар онцлогтой санагддаг вэ?

-3x3 бол маш хурдан өрнөдөг төрөл 12 секундэд довтолж, хамгаалдаг. Богино хугацаанд өрнөдөг учраас ядардаг, биеийн хүч илүү шаарддаг онцлогтой.

-Сагсан бөмбөгийн спорт таны амьдралыг хэрхэн өөрчилсөн бэ?

-Зан төлөв, амьдралын хэв маяг гээд олон зүйлд эерэг өөрчлөлт гарсан. Хэдэн цагт ч хамаагүй хоол идчихдэг байсан бол одоо илүү эрүүл, чийрэг байхын тулд зөв хооллож хэвшсэн. 

-Багийн спорт шүү дээ, багийнхантайгаа хэрхэн ойлголцдог вэ?

-Багаасаа тоглосон болохоор ахлах сургууль, их сургууль, дугуйлан гээд олон багт тоглосон. Тэгэх бүрдээ хүмүүстэй танилцдаг учраас их нийтэж болсон. Ийм нийтэч учраас багийнхантайгаа сайн ойлголцдог.

-Тамирчдад хувийн номер нь их үнэ цэнтэй байдаг шүү дээ.  Анх хувийн номероо хэрхэн сонгож байсан бэ?

-Миний хувийн дугаар долоо. Жаахан байхаас эхлээд долоогийн номер гоё харагддаг байсан учраас сонгож хувийн номероо болгосон. Одоо гэрээр минь дүүрэн долоогийн тоотой өмсгөл бий.

-Оролцож байсан тэмцээнүүд  дундаас нь хамгийн сэтгэлд үлдсэн тэмцээн бий юү. Онцолж яривал?

-2019 онд 18 насныхны дэлхийн аварга шалгаруулах тэмцээнд оролцож байсан. Гэхдээ медаль авч чадаагүй л дээ. Гэхдээ тус тэмцээний Беларусь Улстай хийсэн тоглолт хамгийн дурсамжтай нь. Сүүлийн мөчид хожлын шидэлтийг манай баг хийсэн.

-Тэмцээнд оролцохоосоо өмнө сэтгэл зүйгээ хэрхэн бэлддэг вэ. Талбай дээр гарахаасаа өмнө заавал хийдэг зүйл, зуршил бий юү?

-Байнга хийдэг зүйл, зуршил байхгүй юм байна. Гэхдээ тэмцээн эхлэхийн өмнө өөртэйгөө ярилцдаг.

-Таны дараагийн мөрөөдөл, зорилго юу байгаа вэ?

-Миний дараагийн зорилго дээд лигийн аварга болох. Мөн гадаадын лигт тоглож үзэхийг хүсэж байгаа. Энэ бүгдээс илүү эх орноо төлөөлөн олимпод оролцох тамирчин болохыг л хүсэж, зорьж байна даа.