Улаанбаатар хотоос Ховд аймаг руу зорчиж байсан автобус Говь-Алтай аймгийн Улаан туг багийн Дундын овоо гэдэг газар энэ сарын 11-нд шатсан. Автобусанд хоёр жолооч эм, эмнэлэгийн хэрэгсэл, бусад дайвар ачааг ачиж явсан бөгөөд бүх нь ачаа нь шатсан аж. Тиймээс осол гарсан шалтгаан болон жолоочид хэчнээн төгрөгийн хохирол учирсан талаар жолоочийн дүү Т.Алтангэрэлээс тодрууллаа.

-Автобус юунаас болж шатсан гэж үзэж байгаа вэ. Жолооч нарын биеийн байдал ямар байна вэ?

     -Говь-Алтай аймгаас Ховд аймаг руу явж байхад нь автобусны нум нь эвдэрсэн юм билээ. Тэгээд Ховд аймгаас хадам аав нь эхнэртэй нь хамт  сэлбэг аваачиж өгсөн. Тэр өдрийн 11:00 цагаас хөдөлж, 20 км орчим яваад очиход нь шатсан гэсэн. Ах хэлэхдээ "Цахилгааны утас салж, нийлснээс болсон байх" гэж байна лээ. Харин тэдний араас ахын эхнэр машинтайгаа дагаж явж байгаад автобус нь хазайгаад байхаар нь дуут дохио өгсөн гэсэн. Тэгээд ахыг толиндоо хартал автобус нь шатаж байсан гэсэн. Хаалгаар буух боломжгүй болж битүү гал гарахаар нь хамт явсан жолоочдоо “Хоёулаа амь амиа аваръя” гэж хэлээд  цонхоороо үсэрч гарсан юм билээ. Ахын нуруу нь маш их өвдөж байгаа. “Хүнд ажил хийж болохгүй” гэж эмч хэлсэн гэсэн. Нөгөө жолооч нь залуу хүн байсан тулдаа гайгүй. Гэхдээ гэдэс нь шалбарсан гэж дуулдсан.

-Автобусанд эмнэлгийн ачаанаас өөр ямар ачаа байсан бэ. Хэчнээн төгрөгийн хохирол учирсан бол?

     -Эмнэлгийн эм, тарианаас гадна 1.6 сая төгрөгийн үнэтэй буйдан, 2.5 сая төгрөгийн үнэтэй дэлгүүрийн хүнсний бараа байсан. Мөн ахад нэг хүн “Гар утас шүү” гэж хэлээд  нэг  хайрцагтай юм өгсөн гэсэн. Түүнээс гадна дайвар ачаа гэж юу нь тодорхойгүй хоёр хайрцаг зүйл өгсөн юм билээ. Гэтэл утасны эзэн бүгд гар утас байсан гэж 50 сая төгрөг нэхэмжилж байгаа. Тэгэхээр ах минь “Гар утас шүү” гэж хэлж өгсөн хайрцагт хэчнээн утас байсныг мэдэхгүй шүү дээ. Ямар хүний ачаа онгойлгож үзсэн биш дээ. Ингээд ах минь нийт 175 сая төгрөгийн өрөнд орчихоод байгаа юм. Ах минь үүнийг мэдээд сэтгэл санаагаар  маш их унаж байгаа. Хоёр удаа амиа хорлох гэж оролдсон.  Бид тайвшруулах гэж их хичээж байгаа. Бас аав минь 75 настай хөгшин хүн байдаг болохоор хүүгийнхээ ослын тухай сонсоод сэтгэл нь хямар ч, хоёр хоног хоол идсэнгүй. Уйлаад л байгаа.

-Таны ах хэдэн хүүхэдтэй вэ?

    -Гуравдугаар ангийн нэг охинтой.

-Шатсан автобус нь таны ахын хувийн унаа юу. Ачаа тээврийн жолооч болоод хэдэн жил болж байна вэ?

     -Тиймээ, ахын өөрийнх нь автобус. Гэхдээ автобусныхаа тал өрийг өгөөгүй байсан юм. Ах минь Ховд-Улаанбаатар хотын хооронд ачаа тээвэрлээд хоёр жил болж байна.

-Танай аймгийнхан ахад нь хэрхэн туслаж байна вэ?

     -"Ахад минь туслаарай гэж" хандивын аян зарлаад хоёр хонож байна. Одоо хэдэн төгрөг цугларсан гэдгийг мэдэхгүй байна. Нутгийнхан минь туслах байх гэж бодож байгаа. 

Та жолоочид туслахыг хүсвэл /5866235001/ Ц.Түвшинбаатар дансанд хандаарай.