Хүүхдүүдийн үе тэнгийнхний дундах дээрэлхэлтийн асуудал газар авч, нэгнээ дээрэлхэж, зодож буй тухай харуулсан дүрс бичлэгүүд цахим сүлжээнд идэвхтэй гарах болсон. Түүнчлэн бага насны хүүхэд хүчирхийлэлд өртсөн, сураггүй болсон тухай сэтгэл сэртхийлгэм мэдээлэл сошиалаар түгж байна. Үүнтэй холбоотойгоор эцэг, эхчүүд бага насны хүүхдэдээ тавих хараа хяналтаа нэмэгдүүлж байгаа ч мэргэжлийн хүний зөвлөгөөгүйгээр хүүхдийнхээ аюулгүй байдлыг нь хэрхэн хангах, хамгаалах тал дээр мэдээлэл муу байгаа. Тэгвэл Эргэлт.мн бага насны хүүхдээсээ хол байсан ч анхаарал тавьж, аюулгүй байдлыг нь хангах боломжийг бүрдүүлэх төхөөрөмжүүдийг танилцуулъя.

                             Эцэг, эх, асран хамгаалагчид бага насны хүүхдүүдээ цэцэрлэг, сургууль дээрээ юу хийж байгаа, хаана байгааг орчин үеийн ухаалаг төхөөрөмжүүд ашиглан мэдэх боломжтой болжээ. Тухайлбал, IoT технологид суурилсан тусгай жижиг хэмжээтэй бугуйн цаг, хүзүүний зүүлт, түлхүүрийн оосор, энгийн зүүлт зэрэг төхөөрөмжийг ухаалаг гар утастайгаа холбосноор хүүхдийнхээ байршлыг тогтоох, бага насны хүүхэд эцэг, эх, асран хамгаалагчаасаа төөрсөн бол чанга дуу гаргах зэрэг үйлдэлтэй хүүхдийн аюулгүй байдлын хамгаалах ухаалаг төхөөрөмжүүд гарсан байна.

Байршил тогтоох:

                             Хүүхдийнхээ байршлыг гар утсан дээрээ газрын зураг дээр харах, хянах, байршлын түүхийг харах зэрэг үйлдэлтэй (GPS tracking).

Яаралтай дуудлага хийх, мессеж илгээх:

                             Хэрэв хүүхдэд тань аюултай зүйл тохиолдвол тусламж дуудах, эцэг эх рүүгээ хялбар аргаар дуудлага хийх (Call), мессеж илгээх. Ганцхан товч дараад урьдчилсан сануулсан гар утасны дугаарууд руу дуудлага хийх, мессеж илгээх (SMS).

Яаралтай тусламжийн дуудлага хийх :

                             Хүүхэд хэн нэгний дээрэлхэлт, хүчирхийлэлд өртсөн үед гэмт хэрэгтэн, холбогдогчид мэдэгдэлгүйгээр эцэх, эхдээ эсвэл цагдаагийн байгууллагад мэдээлэх яаралтай тусламжийн дуудлага (SOS)

Чанга авиа гаргах:

                             Аюултай нөхцөл байдал үүссэн үед эргэн тойрны хүмүүстээ сонсогдохуйц чанга дуу гарган мэдэгдэх үйлдэл.

Дуу хоолой бичих:

                             Энэ төрлийн ухаалаг төхөөрөмжтэй хүүхэд бугуйн цаг, хүзүүний зүүлт, түлхүүрийн оосор, энгийн зүүлт зэрэг хэлбэртэй төхөөрөмжөө ашиглан бусдад мэдэгдэлгүй дууг нь хураан авах боломжтой (Voice recording).

Сэрүүлэг:

                             Мөн дээр дурдсан төхөөрөмжийг ашиглан сэрүүлэг тавьж, өөрийн байгаа байршлын мэдээллээ эцэг, эх, асран хамгаалагч руугаа явуулах боломжтой аж.

Үнэ:

                             Үнэ ханшийн хувьд хүүхдэд зориулсан байршил тогтоогчтой тусгай ухаалаг төхөөрөмж нь гадаадыг "Amazon", "eBay" зэрэг худалдааны сайтад 20-70 ам.долларын үнэтэй байх бөгөөд Монголд орж ирсэн төхөөрөмжүүд худалдаанд 40-200 мянган төгрөгөөр худалдааглагдаж байгаа юм байна

Түүнчлэн зөвхөн энэ төрлийн тусгай төхөөрөмж гэлтгүй эцэг, эх, асран хамгаалагчид хүүхдийнхээ ухаалаг гар утсанд Монгол хэлтэй “E-Mongolia”, “E-Kids” гэсэн аппликейшн суулгаснаар хүүхдийнхээ байршлыг тогтоож, цагийн хяналт тавих боломжтой юм байна.