Аялал зугаалгын улирал эхэлж, байгалийн үзэсгэлэнт газруудыг биширч, нар, салхинд явсаар нүүрний арьс тань харласан уу. Учир нь нарны хэт ягаан туяанаас арьс өөрийгөө хамгаалахаар меланин ялгаруулж, арьс харладаг байна. Тиймээс нүүр болон хүзүүнийхээ арьсанд өдөр бүр нарнаас хамгаалах тос хэрэглэж занших нь чухал.

Арьсаа цайруулах аргууд

Гуужуулах

   Арьс гуужуулах бэлэн бүтээгдэхүүн худалдаж авах эсвэл гэрийн нөхцөлд өөрийн гараар арьс гуужуулагч хийж арьсныхаа наранд түлэгдэж, үхсэн эсүүдээс салаарай. Ингэснээр таны арьс зөөлөрч, цайрах болно. Мөн арьсаа гуужуулсныхаа дараа нарнаас сайн хамгаалахгүй бол маш хурдан түлэгдэж, гэмтдэг.

Кофетой гуужуулагч хийх

• Гурван халбага шинэхэн нунтагласан кофег хагас аяга тарагтай холино.
• Хэрэв та хуурай арьстай бол тослог ихтэй сүү нэмнэ.
• Холигчоор хутгаад таван минут байлгана.
• Холимог өтгөрсний дараа нэг халбага зөгийн бал нэмж сайтар хутгана.
• Энэ хольцыг нүүрэндээ түрхээд 8-10 минутын турш тойруулж үрнэ.
• Хүйтэн усаар зайлж угаана. Энэ гуужуулагчийг долоо хоногт хоёр удаа хэрэглэх нь үр дүнтэй. Кофе нь цусны эргэлтийг сайжруулж, арьсыг гэрэлтүүлэн, залуу харагдуулдаг.

Мөн наранд харалсан арьсыг цайруулахад улаан лооль, тараг, зуун наст, нимбэг үр дүнтэй. Иймд улаан лооль, тарагтай гуужуулагч хийх аргыг хүргэж байна. Хоёр халбага улаан лоолийн шүүсэн дээр ижил хэмжээтэй тараг, нэг халбаг нимбэгний шүүс хийж холиод нүүрэндээ түрхэнэ. Хатсаных нь дараа угааж цэвэрлэнэ. Үүнийг хэрэглэсний дараахан нүүр загатнах ч хатсаныхаа дараа загатнахгүй.

Зуун наст ургамал хэрэглэх

   Зуун наст нь наранд түлэгдсэн арьсыг сэргээх, тайвшруулах нөлөөтэй. Мөн меланин ялгаралтыг бууруулдаг. Унтахаасаа өмнө зуун настын шүүсийг нүүрэндээ түрхээд өглөө босч бүлээн усаар угаахад болно.

Турмерик хэрэглэх

    Энэхүү амтлагчийг энэтхэгчүүд арьсаа цайруулахад ашигладаг уламжлалтай. Судалгаагаар турмерикийг тостой хольж хэрэглэх нь арьсыг чийгшүүлж, нарнаас хамгаалдгийг тогтоожээ. Гэхдээ арьсаа цайруулахаар турмерик хэрэглэсэн бол нүүр цэвэрлэгч ашиглах эсвэл нүүрээ усаар угаагаарай. Учир нь түүний шар өнгө үлдчихдэг. Нэг халбага нунтаг турмерикийг лемоны шүүс эсвэл өргөст хэмэхтэй хольж өтгөн зуурмаг болгоно. Үүнийгээ харласан хэсгүүддээ түрхэж 20-30 минутын турш хатаана. Дараа нь усаар зайлна.

Арьс цайруулах бүтээгдэхүүн

Америкийн арьс судлалын нийгэмлэгээс дараах орцуудын аль нэгийг агуулсан бүтээгдэхүүнийг хэрэглэх нь тохиромжтой гэж зөвлөжээ. Үүнд, витамин Ц, гликолийн хүчил, ретинол, третинон, кожик хүчил, азалейн хүчил гэх мэт найрлагууд багтана. Дээрх найрлагатай бүтээгдэхүүнүүд нь арьсыг гуужуулж, шинэ эсийг дэмжих замаар арьсаг цайруулдаг байна. Гэвч цайруулах бүтээгдэхүүний арьсны эмчийн зөвлөгөөний дагуу тохируулан хэрэглэх хэрэгтэй.