Аймаг, дүүргийн олимпын зөвлөл, олимпын танхимын бүтээлч үйл ажиллагааг эрчимжүүлэх, арга туршлагыг харилцан солилцох зорилготой билээ. Мөн бүх шатны сургуулийн сурагч, ард иргэдэд олимпын боловсрол олгох, олимпын үнэт зүйлс болон олимпын медальтнуудыг сурталчлах зорилготой байдаг.  “Олимп- Эв нэгдэл” чуулга уулзалт эзэн Чингис хааны өлгий нутаг Хан Хэнтий аймагт эхэлж байна.

     “Олимп- Эв нэгдэл” чуулга уулзалтын албан ёсны нээлтийн ажиллагаанд МҮОХ-ны тэргүүн дэд ерөнхийлөгч Ч. Наранбаатар, “Рио 2016” олимпын наадмын хүрэл медальт, Монгол Улсын гавьяат тамирчин Д. Отгондалай, Хэнтий аймгийн Засаг дарга Д. Аюурбунь, Засаг даргын зөвлөх Г. Тайванжаргал болон албаны бусад төлөөлөгчид оролцлоо. Чуулга уулзалт нь Хэнтий аймгийн Бэрх, Дадал, Норовлин, Батноров, Мөрөн зэрэг сумдаар сургалт семинар, уулзалт ярилцлагаар  энэ сарын 16-ныг хүртэл үргэлжлэх юм.