Хүндийн өргөлтийн Үндэсний шигшээ багийн тамирчин, ОУХМ Чойжхүүгийн Анужинтай ярилцлаа. Тэрбээр өсвөр үе, залуучууд, насанд хүрэгчдийн УАШТ-ий алт, мөнгө, хүрэл медальтай. Монгол Улсын рекорд, дээд амжилтыг шинэчлэн тогтоож байсан манай улсын өсөж яваа шилдэг залуу тамирчдын нэг билээ.

–Манай уншигчдад өөрийгөө танилцуулахгүй юу?

         -Сайн байна уу. Намайг Чойжхүү овогтой Анужин гэдэг.

 –Аль нутгийн хүүхэд вэ?

     -Уг нь бол унаган Улаанбаатар хотын хүүхэд байгаа юм. Аавынхаа нутгаар бол Булган аймгийн Могод сумынх гэж явдаг.

-Одоо хэдэн настай вэ?

      -Одоо би 21 настай.

-Хүндийн өргөлтийн спортын ямар зэрэг , цолтой тамирчин бэ?

     -Би хүндийн өргөлтийн Олон улсын хэмжээний мастер цолтой. Бас хүчний спорт буюу пауэрлифтингийн спортын мастер цолтой.

 -Хэдэн настайдаа хүндийн өргөлтөөр хичээллэж эхэлсэн бэ?

    -Анх хүндийн өргөлтөөр 13 настайгаасаа эхэлж хичээллэсэн.

–Хүндийн өргөлтөөс өмнө өөр спортын төрлөөр хичээллэж байсан уу?

      -Хүндийн өргөлтөөс өмнө гүйх их дуртай хүүхэд байв. Мөн рольк, скүүтер их унадаг байсан даа.

-Яагаад чухам хүндийн өргөлтийн спортыг сонгож хичээллэх болов?

      -Хүндийн өргөлт нь багийн спорт гэж явдаг ч гэсэн илүү ганцаарчилсан спортын төрөл.  Хувь тамирчин өөрөө өөртэйгөө ярилцаж, сэтгэл зүйгээ бэлдэн, өөртэйгөө тэмцэж ялдаг болохоор хүндийн өргөлтөд маш их дуртай.

 –Эмэгтэй хүнд эрсдэл ихтэй, тэсвэр хатуужил шаардсан хүнд спортын төрөл биш үү?

     -Ер нь эрэгтэй, эмэгтэй гэх ялгаа байхгүй хүнд спорт л доо. Гэхдээ ганц хүчээр  хүндийг өргөчихдөггүй, уян хатан, хурд, тэсрэлт, техник, тэсвэр хатуужил, сэтгэл зүй гээд бүгдийг хослуулах л ёстой.

-Хүндийн өргөлт эмэгтэй хүний бие бялдар хөгжил болон галбирт өөрчлөлт оруулдаг уу?

      -Төмөр өргөвөл өсөхгүй гэж ярьдаг л даа. Энэ худлаа шүү. Их өндөр болдог. Аан тийм бие бялдрын хувьд бол тийм том овоож, товоосон булчинтай болохгүй. Харин  ч илүү өв тэгш, зөв суурьтай, бие бялдрын бүтэцтэй болдог.

–Хүндийн өргөлтийн спортоос шантарч, мохох үе гарч байсан уу?

     -Анх хичээллэж эхлэх үед бага зэрэг шантарч мохох зүйл гардаг байлаа. Одоо больё доо гээд хүндийн өргөлтөөс гараад гурван сар болоод буцаад бэлтгэлдээ орж байсан. Дуртай, сонирхолтой зүйл болохоор орхиж чадахгүй татагдаад байдаг юм билээ.  Бэлтгэл хийхгүй удаан байх хэцүү юм байна лээ.

 -Манай улсад эмэгтэй хүндийн өргөлтийн тамирчид хэр олон байдаг вэ?

       -Ер нь хүндийн өргөлтөд хөвгүүдээс илүү охидууд их дуртай болсон юм шиг харагддаг. Охид, эмэгтэйчүүд арай илүү амжилт гаргаад байгаа.

 -Хүндийн өргөлтөд хүч, бяр, тэнхээнээс илүүтэйгээр техник, ур чадвар  их чухал биз?

       -Тийм ээ, тэгэлгүй яах вэ. Ганц бяртай байлаа гээд техникгүй бол хол явахгүй л дээ. Хүндийн өргөлтийн спортод хамгийн чухал зүйл мэдээж техник гүйцэтгэл. Хүч, бяр, тэнхээ аяндаа суучихдаг. Гэхдээ төрөлхийн бяр, тэнхээтэй  хүн ч байдаг.

–Хүндийн өргөлтийн спортоор хичээллэсэн үеэс хойших томоохон амжилтаасаа сонирхуулахгүй юу?

      -Одоохондоо гадагшаа тэмцээнд явж амжаагүй л байна. Өсвөр үе, залуучууд, насанд хүрэгчдийн ангиллын улсын аварга, улсын рекорд, дээд амжилтыг хэд хэдэн удаа шинэчлэн тогтоож байсан.

-Хүндийн өргөлтийн анхны багш нь хэн бэ

      -Миний хүндийн өргөлтийн анхны багш гэвэл Дөрвөнжингийн Чинзориг гэдэг дасаглжуулагч бий. Багш маань одоогоор “Ээрмэл” клубийн багш, дасгалжуулагчаар ажиллаж байгаа.  Багшдаа их баярлаж явдаг аа шүү гэдгээ дамжуулан хэлье.

-Одоо ямар клуб, нийгэмлэгт бэлтгэл, сургуулилалтаа хийж байгаа вэ?    

     -Одоо БТСУХ-ны Спортын төв ордонд Үндэсний баг дээр Монгол Улсын гавьяат дасгалжуулагч Цэнхэржавын Хосбаяр багшийнхаа удирдлага дор бэлтгэлээ хийж байгаа. Ярилцлага авсан танд болон танай хамт олонд баярлалаа.