Монголын хөл бөмбөгийн холбоо (МХБХ) 2026 онд Олон улсын хөл бөмбөгийн холбоо (FIFA)-ны дэмжлэгтэйгээр дэлхийн стандартад нийцсэн арван “Мини” хөл бөмбөгийн талбай, нэг спортын эйрдом байгуулах ажлыг эхлүүлээд байна. УИХ-д Баян-Өлгий аймгаас сонгогдсон, Засгийн газрын гишүүн, Гэр бүл, хөдөлмөр, нийгмийн хамгааллын сайд Т.Аубакирын санал, хүсэлтийн дагуу дээрх арван талбайн нэгийг Баян-Өлгий аймагт барьж байгуулахаар шийдвэрлэжээ.

      УИХ-ын гишүүн, Гэр бүл, хөдөлмөр, нийгмийн хамгааллын сайд Т.Аубакир Баян-Өлгий аймгийн ирээдүй болсон өсвөр үеийнхэнд зориулсан энэхүү бүтээн байгуулалтад санаачилга гарган, бодитой дэмжлэг үзүүлэн, хүүхэд залуучуудыг дэмжих тодорхой төлөвлөгөө гарган илгээж, Монголын хөл бөмбөгийн холбооны дэмжлэгтэйгээр ийнхүү талбай байгуулах санал дэмжигдсэн юм. Хүүхэд, залуучуудад хөл бөмбөгийн спортыг түгээн дэлгэрүүлэх, энэхүү спортыг хөгжүүлэх зорилготой Монголын хөл бөмбөгийн холбооны бүтээн байгуулалт, цаашид олон аймаг, сумдад үргэлжилнэ гэнэ.