“Central Asian Treasury company”-ийн “CATCO racing team” багийн дугуйчин, спорт мастер Гантогтохын Энхжинтэй ярилцлаа. Жилээс жилд амжилт нь өсөж яваа тэрбээр Монгол Улсын нэрийн өмнөөс тив, дэлхийн тэмцээнд амжилттай уралдаж яваа цөөн эмэгтэй дугуйчдын нэг билээ.

–Манай уншигчдад өөрийгөө танилцуулахгүй юу?

    -Намайг Гантогтох овогтой Энхжин гэдэг.

 –Аль нутгийн хүүхэд вэ?

       -Өвөрхангай аймгийн Арвай хээр суманд төрж, өссөн.

-Одоо хэдэн настай вэ?

       -Би одоо 25 настай.

-Дугуйн спортын ямар зэрэг , цолтой тамирчин бэ?

        -Дугуйн спортын Монгол Улсын спортын мастер цолтой.

-Хэдэн настайдаа дугуй унаж сурсан бэ?

       -Ер нь их багадаа дугуй унаж сурсан шүү. Яаж сурснаа, хэдэн настай байсан гэдгээ сайн санадаггүй юм. Ямар ч байсан сургуульд ороогүй байх даа дугуй унаж сурсан.

–Дугуйнаас өмнө өөр спортын төрлөөр хичээллэж байсан уу?

     -Дугуйн спортоор хичээллэхээс өмнө урлаг, спорт гээд их олон зүйл сонирхож байсан шүү.

-Яагаад чухам дугуйн спортыг сонгож хичээллэх болов?

     -Манай нэг найз маань дугуйн спортоор хичээллэж үзээч гэж их гуйдаг байсан. Тухайн үед нь өөр зүйлээр хичээллэдэг байсан болохоор нэг их ойшоож сонирхоогүй юм. Гэтэл тэр найз маань түүнээс хойш нэг их удалгүй бурхны орон руу явчихсан. Тэгээд л найзынхаа эцсийн хүсэлтийг нь биелүүлье, дугуйн спортоор түр зуурч болов хичээллэж үзье гэж шийдээд орж байлаа.

–Эмэгтэй хүнд эрсдэл ихтэй, тэсвэр хатуужил шаардсан хүнд спортын төрөл биш үү?

      -Дугуйн төрөл техникийн спорт болохоор тийм ч амар биш л дээ. Гэхдээ дугуйн спорт намайг соронзон мэт татаж,  дурлуулан, “донтуулж” чадсан.

-Дугуйчид уралдааны замд “Нугаралт” үүсэх үед олуулаа унаж байгаа харагддаг. Уралдааны үеэр унаж байв уу?

    -Уралдааны үед тийм зүйл байлгүй яах вэ. Тэмцээн гэлтгүй, бэлтгэл дээр ч бас унах тохиолдол гардаг. Том бэртэл, гэмтэл авчихгүй бол өвдөг, хөл, гар, тохойны арьс шалбарч, зулгарах бол юу ч биш.

-Гэмтэл, бэртэл авсны дараа шантарч, мохох үе гардаг уу?

     -Гэмтэл, бэртэл ер нь бүх төрлийн спортын тамирчдад хүнд тусдаг, амжилтыг хойш татдаг зүйл. Гэмтлийн дараа тамирчид сэтгэл зүйн асар өндөр шалгуурыг даван туулдаг. Эхлэн хичээллэж байхад мохох, шатрах үе гарч байсан шүү.

-Манай улсад эмэгтэй дугуйчид хэр олон байдаг вэ?

     -Эмэгтэй дугуйн спорт Монголд одоогоор шинэ тутам хөгжиж байгаа спорт болохоор эмэгтэй тамирчид тийм их биш.  

     –Хотын хөдөлгөөн, түгжрэл ихтэй замд дугуйтай явах эрсдэл өндөртэй биз?

     -Хотын авто замын хөдөлгөөн маш их байгаа нь асуудалтай шүү. Өөрөө л анхаарал, болгоомжтой явахгүй бол болохгүй. Өөрөөс чинь гадна хэн нэгэн анхааралгүй явааг хэзээ ч мартаж болохгүй. Зориулалтын дугуйн замтай бол асуудал гарахгүй амар л болох байх.

-Дугуй техникийн спорт тийм болохоор тамирчны бэлтгэл сургуулилалтаас гадна дугуйны бүрэн бүтэн байдал нь амжилтад нөлөөлнө биз?

     -Тийм шүү, дугуйны бүрэн бүтэн байдал амжилтад маш ихээр нөлөөлнө. Хэдий хувь тамирчны бэлтгэл сайн байлаа ч дугуй муу бол хэзээ ч амжилт гаргахгүй. Дугуйчдын хувьд дугуй бол биеийнх нь нэг хэсэг, амжилт гаргах гол хэрэгсэл юм.

 -Уралдааны замд дугуйн хөнгөн эвдрэл гэмтэл гарвал өөрөө засдаг уу?

      -Нэг тамирчны ард бүхэл бүтэн баг ажиллаж байдаг. Ямар ч асуудал гарсан, ард минь дасгалжуулагч маань байдаг болохоор санаа зовдоггүй.

 -Дугуйн ямар төрөлд уралддаг вэ?

      -Би уулын дугуй болон уралдааны дугуйн төрөлд уралддаг.

-Одоо ямар клуб, нийгэмлэгт бэлтгэл, сургуулилалтаа хийж байгаа вэ?

        -Одоо “Central Asian Treasury company”-ийн нэр дээрх “CATCO racing team” багийн тамирчнаар ажиллаж байгаа.