Хүүхдийн хөгжил, хамгаалал, нийгмийн хариуцлагын хүрээнд үйл ажиллагаа явуулдаг “Монголын хөл бөмбөгийн Одод” төрийн бус байгууллага зорилтот бүлгийн хүүхдүүдэд зориулсан эрчимжүүлсэн хөл бөмбөгийн сургалтын кэмпийг 2025 оны наймдугаар сарын 5-6-ны өдрүүдэд Монголын хөл бөмбөгийн холбооны цэнгэлдэх хүрээлэнд амжилттай зохион байгууллаа.

     Кэмпэд нийслэлийн болон орон нутгийн асрамжийн төв, хөгжлийн үйлчилгээ үзүүлдэг байгууллагуудаас нийслэлийн Хүүхэд, залуучуудын сургалт, хүмүүжлийн тусгай цогцолбор, Кристина Ноблийн “Хүүхдийн Сан” ТББ, “Бадамлянхуа” асрамжийн төв, “Ид шидийн орон-2” төвийн 7-17 насны нийт 80 орчим хүүхэд оролцлоо.

    Сургалтыг Европын хөл бөмбөгийн мэргэжлийн түвшний “А” зэрэглэлийн стандартын дагуу, олон улсын туршлагатай дасгалжуулагчид удирдан явуулсан нь кэмпийн чанар чансааг илтгэж байлаа. “Хөл бөмбөгийн Одод” академийг санаачлагч, дасгалжуулагч Мартин Штайн, хамтран санаачлагч Кристиан Вольф "Монголын хөл бөмбөгийн одод" ТББ-ыг үүсгэн байгуулагч Улаанхүүгийн Отгонбаяр нар оролцсон юм.