Монгол Улсын нийслэл Улаанбаатар хотноо Ази тивийн шилдэг 16 улсын өсвөрийн сагсчид чуулж, ирэх онд Турк Улсад болох “U17” ангиллын ДАШТ-д оролцох эрхийн төлөө өрсөлдөх гэж байна.

    Сагсан бөмбөгийн найм дахь удаагийн Ази тивийн аварга шалгаруулах тэмцээн энэ сарын 31-ээс эхлэн ирэх есдүгээр сарын 7-ны өдрийг дуустал “М Банк” арена болон “Буянт Ухаа” спортын ордонд зэрэг явагдах ба Монгол Улсын шигшээ багийн хөвгүүд анх удаа тивийн аваргад хүч сорих юм.

    Манай шигшээ баг “C” хэсэгт урд хөрш БНХАУ болон Өмнөд Солонгос, Малайзын багуудтай учраа таарсан бөгөөд Ц.Азбаяраар ахлуулсан дасгалжуулагчдын баг одоогоор өргөтгөсөн бүрэлдэхүүндээ нийт 16 тоглогчийг дуудаж, үүнээс 12 нь үндсэн багт тоглоно гэдгийг холбооны зүгээс мэдэгдсэн.

     Хятадын баг энэхүү тэмцээнд зургаан удаа оролцохдоо гурван алт, нэг мөнгө, хоёр хүрэл медаль хүртсэн амжилтаараа бүх улсыг тэргүүлдэг байна. Харин Өмнөд Солонгос нэг алт, хоёр мөнгөн медалиас гадна нэг ч тэмцээн алгасаагүй хүчирхэг багуудын нэг. Мөн Малайзын шигшээ зургаан удаа оролцож байсан туршлагатай ба 2013 онд IX байрт  бичигдсэн нь тэдний хамгийн сайн үзүүлэлт ажээ. Азийн аваргын хагас шигшээд шалгарсан дөрвөн баг 2026 онд Турк Улсын нийслэл Истанбул хотод зохиогдох “U17” ангиллын ДАШТ-д оролцох эрхтэй болно.