Монголын сагсан бөмбөгийн холбооноос энэ жилээс жил бүр "Холбооны цом"-ын тэмцээнийг зохион байгуулахаар болсон байна. Үүнд эмэгтэй “Үндэсний дээд лиг”-ийн зургаан баг, “М Хөгжлийн лиг”-ийн найман баг, “Оюутны лиг”-ийн хоёр баг, нийт 16 баг өрсөлдөнө.  Харин эрэгтэйчүүдийн тэмцээнд “Үндэсний дээд лиг”-ийн  баг, “М Хөгжлийн лиг”-ийн 16 баг, “Оюутны лиг”-ийн зургаан баг, нийт 32 баг өрсөлдөх юм.

       Тэмцээн шууд хасагдах шат (direct elimination) буюу нугалааны зарчмаар явагдана.  Эрэмбийг тогтоохдоо “Үндэсний дээд лиг”, “М Хөгжлийн лиг”, “Оюутны лиг”-ийн амжилтын хүснэгтийг үндэслэнэ. Тоглолтуудыг бусад лигийн тоглолтуудтай давхцуулахгүй ба Пүрэв гараг бүр зохион байгуулахаар төлөвлөж байна.

      Холбооны цомын аваргууд тодрох финалын тоглолт Үндэсний эрх чөлөө, тусгаар тогтнолоо сэргээсний баярын өдөр буюу 2025 оны 12 дугаар сарын 29-ний өдөр “М банк Арена”-д болно. Тэмцээнд зөвхөн Монгол тоглогчид, Монгол дасгалжуулагчид оролцон, Монгол шүүгчид шүүн явуулна.

       Энэ дотоодын өрсөлдөөнийг нэмэгдүүлж тоглогчдын ур чадварыг өсгөх, Монгол дасгалжуулагчдын гадаад мэргэжилтнүүдээс суралцсан мэдлэгээ хэрэгжүүлэх зэрэг боломжуудыг олгож байгаа юм. Шагналын сангийн хувьд эмэгтэй, эрэгтэй ангилал тус бүр 200 сая төгрөг байна.