Монгол Улсын гавьяат дасгалжуулагч Цэрэнбаатарын Хосбаяр 1965 оны энэ өдөр Ховд аймгийн Чандмань суманд мэндэлжээ. Тэрбээр Монголын чөлөөт бөхийн 48 кг-ын жингийн шилдэг тамирчдын нэг байлаа.  Чөлөөт бөхийн дэлхийн аварга МУГТ П.Орхон, МУГТ С.Цэрэнчимэд, МУГТ Мандахнар, МУГТ Б.Одончимэг, ОУХМ Э.Даваанасан, ОУХМ Г.Ариунжаргал, ОУХМ Г.Отгонжаргал, ОУХМ Б.Мөнхнар, ОУХМ Б.Отгонтуяа, ОУХМ Ч.Отгонтуяа, ОУХМ Ц.Цогбадрах, ОУХМ Т.Энхжин нарын амжилт  "Алдар" болон “Аваргууд” академийн  ах, дүү  гавьяат дасгалжуулагч Ц.Хосбаяр, гавьяат тамирчин Ц.Цогтбаяр хоёрын хичээл чармайлт,хөдөлмөр зүтгэлтэй холбоотой билээ.

     МУГД Ц.Хосбаяр дасгалжуулагчийн ур чадвар хэдийнэ Монголын чөлөөт бөхийн спортын өнөөгийн хөгжилд бодит хувь нэмэр оруулж, тамирчдынх нь амжилт, дэлхийн хэмжээнд хүрч, Монголын чөлөөт бөхийн өнгийг нь тодорхойлж яваа гэдэгтэй хэн ч маргахгүй биз ээ. Дэлхийн аварга болон дэлхийн медальтан төрүүлэн гаргана гэдэг нөр их хөдөлмөр, зүтгэл билээ. Гавьяат дасаглжуулагч Ц.Хосбаяр багшийн олон шавь түүхэн амжилтын түүчээ болж, эх орныхоо нэрийг тив, дэлхийд дуурсгаж яваа.

     Цэрэнбаатарын дөрвөн хүүгийн том нь болох МУГД Ц.Хосбар гурван дүүгийн хамт 1990-ээд оны үед  Монголын чөлөөт бөхийн хөнгөн жинг нуруундаа үүрч, тив дэлхийд улс эх орныхоо нэр нүүрийг тахалж явсан билээ. Тэдгээрээс хамгийн онцлууштай, бахархууштай нь яах аргагүй 1992 оны Барселоны олимп. Тус олимпод Ц.Хосбаяр 48 кг-д, Ц.Цогтбаяр 57 кг-д, Ц.Энхбаяр 52 кг-д хамтдаа зодоглосон ховорхон амжилтын эзэд болсон. Нэг спортын төрөлд ах дүү гурав хамтдаа оролцсон нь Монголын чөлөөт бөхийн спортод шинэ түүх бичиж, өдгөө ч бахархал болон дуурсагдаж байгаа билээ.