Дархан-Уул аймгийн өсвөрийн хөл бөмбөгийн шигшээ багийн тамирчид Япон Улсын өсвөрийн хөл бөмбөгчидтэй хамтран хамтарсан бэлтгэл сургуулилалт хийж, харилцан туршлага солилцож байна. Энэхүү хамтын ажиллагаа нь хоёр орны өсвөрийн тамирчдын ур чадварыг ахиулах, олон улсын түвшний сургалтын арга барилд суралцах, спортын салбарын харилцаа, хамтын ажиллагааг өргөжүүлэхэд чиглэж байгаа юм.

    Хамтарсан бэлтгэлийн хүрээнд Дархан-Уул аймгийн Засаг даргын орлогч Б.Жавхлан Япон Улсын өсвөрийн тамирчид, дасгалжуулагч нарыг албан ёсоор хүлээн авч, хүндэтгэл үзүүллээ. Мөн Монголын хөл бөмбөгийн холбооны ерөнхийлөгч биечлэн хүрэлцэн ирж, хоёр орны өсвөрийн тамирчидтай уулзан, дурсгалын бэлэг гардуулсан бөгөөд энэ үеэр 2025 онд зохион байгуулагдах “Ирээдүйн Марадона” тэмцээнд Япон Улсын багийг урьж оролцуулахаа илэрхийллээ.

     Түүнчлэн тус аймагт 2026 онд мини хөл бөмбөгийн талбай шинээр барих хөрөнгө оруулалтын ажил хийгдэхээр төлөвлөгдөж байгааг танилцууллаа. Хамтарсан сургуулилтын явцад дасгалжуулагч нар орчин үеийн сургалтын арга зүй, дасгал сургуулилтын хөтөлбөр, хөгжлийн чиг хандлагын талаар харилцан санал солилцож, бодит туршлагаасаа хуваалцсан нь хоёр орны хамтын ажиллагааг илүү бодитой, үр өгөөжтэй болгож байна.

     Дархан-Уул аймгийн Биеийн тамир, спортын газар болон аймгийн Хөл бөмбөгийн холбооны хамтран зохион байгуулсан энэхүү хамтарсан бэлтгэл, уулзалт нь өсвөрийн тамирчдын авьяасыг хөгжүүлэх, хоёр улсын спортын найрсаг харилцааг бэхжүүлэх, олон улсын хамтын ажиллагааг өргөжүүлэхэд онцгой ач холбогдолтой юм.