Монгол Улсад анх удаа олон улсын чанартай хөл бөмбөгийн зуслангийн сургалт зохион байгуулагдаж байна. Тодруулбал: 2025 оны наймдугаар сарын 1-4-ний өдрүүдэд  Дархан хотод “Seeds” төрийн бус байгууллагын санаачлан хэрэгжүүлж буй “Beyond Border Camp 2025 in Mongolia” төсөл явагдана.

     Төслийн хүрээнд хөлбөмбөгийн спортоор хичээллэдэг Япон 12 сурагч хүүхдүүд, багш дасгалжуулагчийн хамтаар Дархан хотыг зорин ирсэн бөгөөд дөрөв хоногийн турш өсвөрийн хөл бөмбөгийн багтай хамтарсан бэлтгэл хийж монгол ахуй, соёлтой танилцах зэрэг олон талт хөтөлбөрүүд зохион байгуулагдахаар төлөвлөжээ.

     Тэд Дархан хотыг сонгосон гол шалтгаанаа “Монгол Улсын Төрийн дуулал Дархан гэж эхэлдэг нь сонирхол татсан,  мөн |Дархан залуучуудын хот" учраас төслөө хэрэгжүүлэх болсон гэдгийг онцлон хэллээ.  “Seeds” ТББ нь хөл бөмбөгөөр дамжуулан хүүхдүүдэд олон улсын харилцаа, соёлын ялгааг ойлгох, нөхөрлөлийг хөгжүүлэх зорилгоор үйл ажиллагаа явуулдаг байгууллага юм. Тус байгууллага нь өмнө нь Камбож, Филиппин, Непал зэрэг улсад уг төслийг амжилттай хэрэгжүүлсэн байна.