"Торонто-1993"  дэлхийн аварга шалгаруулах тэмцээний хүрэл медальт, Азийн наадам болон Азийн аварга, 1993 оны “Дэлхийн шилдэг бөх”, Монгол Улсын гавьяат тамирчин Цэрэнбаатарын Цогтбаярын нэрэмжит чөлөөт бөхийн насанд хүрэгчдийн анхдугаар олон улсын тэмцээн арваннэгдүгээр сарын 10-12-ны өдрүүдэд Монголын бөхийн өргөөнд үргэлжилж өндөрлөв.

      Монгол Улсын гавьяат тамирчин, дэлхийн аварга П.Орхон дөрвөн жилийн дараа дэвжээнд гарч, Ц.Цогтбаяр багшийнхаа нэрэмжит олон улсын тэмцээнд түрүүллээ. Тэрбээр 62 кг-д дэлхийн аваргын хүрэл медальт Даваачимэгийг 7:4-өөр ялж түрүүлсэн юм.

      Энэ удаагийн тэмцээний эмэгтэйчүүдийн 51 кг-д дэлхийн аваргын мөнгө, хүрэл медальт Д.Отгонжаргалыг, Мөнхгэрэл ялж алтан медаль авлаа.  Харин эмэгтэйчүүдийн 53 кг-д “Алдар” спорт хорооны Отгонжаргал, 57 кг-д олимп, дэлхийн аваргын хүрэл медальт Б.Болортуяа, 62 кг-д дэлхийн аварга П.Орхон, 68 кг-д Болортунгалаг, 72 кг-д Цэгмид нар түрүүлэв.

    Харин эрэгтэйчүүдийн 57 кг-д Мөнх-Эрдэнэ алтан медаль авсан. Түүнтэй барилдах байсан Насанбуян гэмтлийн улмаас барилдаагүй юм. Эрэгтэйчүүдийн 65 кг-д Цогбадрах, 74 кг-д Бямбадорж, 86 кг-д Бат-Эрдэнэ, 97 кг-д Ганхуяг, 125 кг-д Батмагнай нар түрүүлж алтан медаль хүртлээ.