Йордан Улсын Амман хотноо боксын 2022 оны Ази тивийн аварга шалгаруулах тэмцээн ес дэх өдрөө үргэлжилж байна.  Эрэгтэй жингийн хагас шигшээ тулаан өндөрлөснөөр мөнгөн медалийн болзол хангасан боксчид тодорхой болов.  Энэ өдрийн манай "баатар" бол 60 кг-ын жинд Узбекистаны хүчтэй боксчныг 4:1-ийн харьцаатай оноогоор буулган авч алтан медалийн төлөө тулалдахаар шалгарсан Б.Буяндалай байлаа.

      Монголын таван эрэгтэй тамирчин хагас шигшээд өрсөлдсөнөөс ийнхүү Б.Буяндалай ганцаар ялалт авч дөрөв нь хүчтэй өрсөлдөөний эцэст ялагдал хүлээв.  ОУХМ Х.Энхмандах 51 кг-ын жинд Риогийн олимпын аварга, Узбекистаны Хасанбой Дусматовтой тулалдахдаа эхний раундад 4:1-ээр илүүрхэж тэргүүлсэн ч сүүлийн хоёр үед шүүгчид түүнд огт оноо даралгүй  5:0-ээр ялалтыг Узбекистаны боксчинд өгсөн юм.  

     Г.Лундаа 57 кг-д  дэлхий аваргын мөнгөн медальт, Узбекистаны Абдумалик Халаковт 5:0-ээр, Азийн аварга ОУХМ Б.Чинзориг Тайландын Бунжон Синсирид 4:1-ээр, 71 кг-д ОУХМ О.Бямба-Эрдэнэ Азийн наадмын мөнгөн медальт Казахстаны Асланбек Шембергеновт 4:1-ээр оноогоор тус тус ялагдаж, хүрэл медаль дээрээ үлдэцгээлээ.  

       Эрэгтэйчүүд 13 жингийн алтан медалийн төлөө өрсөлдөхөөр найман орны боксчид шалгаран үлдээд байна. Үүнд  Казахстаны ес,  Узбекистаны долоо, Йорданы дөрөв, Тайландын хоёр,  Япон, Монгол, Энэтхэг, Филиппиний боксчид шалгарч үлдэв. Шигшээ тулаанд шалгарч үлдсэн манай хоёр тамирчны нэг Б,Буяндалай рингэний эзэн орон Йорданы Мухамед Абу Жажентай , Т.Номин-Эрдэнэ Солонгосын Азийн наадмын аварга, Ази тивийн аварга Ёонжи Оотой тус тус тулалдана.