Хан Хэнтий аймгийн 100 жилийн ойг угтсан томоохон ажлуудын нэг бол орон нутгийн төсвөөр Хэрлэн сумын төв цэнгэлдэх хүрээлэнг сэргээн шинэчлэх тохижилт, их засварын ажил юм. Аймгийн Засаг даргын санаачилгаар хэрэгжүүлж эхэлсэн ажлын хүрээнд орон нутгийн төсвийн 1.6 тэрбум төгрөгийн хөрөнгөөр их засварын ажил явагдаж эхэлжээ.

    Гүйцэтгэгчээр “Хангай илч дулаан” ХХК шалгарсан бөгөөд наадмын цэнгэлдэх хүрээлэнгийн үзэгчдийн суудал, саравчны суурийн ажил буюу 1.5 метр гүн бетон багана суурилуулах ажил бүрэн дуусаад байгаа аж. Төв цэнгэлдэх хүрээлэнгийн дөрвөн талд 600 шахам авто машины зогсоол, сурын талбай, шагайн асар, саравчны суурь, явган хүний зорчих замын ажил хийгдэж байна.

      Цэнгэлдэх хүрээлэнг дөрвөн улирлын үйл ажиллагаатай болгохоор зорьсон бөгөөд тохижилт, их засварын хүрээнд стадионы дээврийг бүрэн шинэчилж 14 блок бүхий салангид сүүдрэвч шинээр хийж, төв индэр болон ариун цэврийн байгууламжтай байхаар төлөвлөжээ. Мөн 5337 м/кв поликарбонат дээвэр, налуу хийцлэлтэй металлаар хийгдэнэ.