Энэтхэгийн Ченмай хотод болж буй Дэлхийн шатрын 44 дүгээр олимпиадад өрсөлдөж буй Монгол Улсын эмэгтэй шатарчид III  өргийн тоглолтоо шатрын хөгжлөөр дэлхийд тэргүүлэгч гүрэн, дэлхийн чансааны долоодугаарт эрэмбэтэй АНУ-ын хүчирхэг багтай тоглосон. Дэлхийн чансааны 28 дугаар эрэмбэлэгдэж буй бүсгүйчүүд маань тус тоглолтод 3:1-ээр АНУ-ын багийг буулган авч гайхалтай ялалт байгуулсан билээ.

     Манай шатарчдаас Их мастер А.Энхтуул, Олон улсын мастер Б.Баярмаа нар өрсөдөгчтэйгээ тэнцэж, Олон улсын мастер Т.Мөнхзул, дэлхийн шатрын холбооны дэд мастер, 17 настай охин Б.Мөнгөнзул нар хожил авсан. Харин эрэгтэй шатарчид гуравдугаар өрөгт Унгар Улсын багтай 2:2-оор тэнцсэн.

     Тэмцээний дөрөвдүгээр өрөгт манай эмэгтэй шигшээ баг дэлхийд чансааны 10-т жагсаж буй Казахстан Улсын багтай 2:2 харьцаагаар тэнцлээ. Энэхүү тоглолт ширүүн өрсөлдөөнтэй болов. Тус өргийн 1-р ширээнд Их мастер А.Энхтуул 3-р ширээнд Олон улсын мастер Т.Мөнхзул нар тэнцэж, 2-р ширээнд Олон улсын мастер Б.Баярмаа хожигдсон хэдий ч , 4-р ширээнд ФИДЕ мастер Д.Мөнхзул хожсоноор 2:2-оор тэнцсэн байна. Дараагийн тойрогт эмэгтэй баг маань дэлхийд 14-т жагсаж буй Герман Улсын багтай оноолт таарчээ.

     Монголын эрэгтэй шигшээ баг маань дэлхийд 3-т жагсаж буй дэлхийн аварга, их мастер Магнус Карлсен ахлагчтай Норвеги Улсын багтай ширүүн өрсөлдөж, 2:2 харьцаагаар мөн тэнцсэн байна. Тэд дараагийн тоглолтооь дэлхий чансааны 18-д жагсаж буй Чех улсын багтай хийнэ. Манай эмэгтэй баг дэлхийн 162 орноос чансаагаар 28-д, харин эрэгтэй баг 188 орноос чансааны оноогоор 45-д жагсаж байгаа юм.