“...Энэ хошууны бузар булайг дэлгэвэл далай далай” гэдэг шиг энэ УИХ-ын гишүүдийн булай, хууль бус үйлдэл барагдахгүй нь ээ. Тэр тусмаа энэ удаагийн парламент дахь гишүүдийн сувдаг шунахай байдал хэрээс хэтэрчээ гэхэд хислдэхээргүй байна. Ганцхан жишээ татахад, 2016-2017 онд УИХ-ын нэр бүхий гишүүд ЖДҮХС-гийн мөнгийг нэг гараараа ах дүү, хамаарал бүхий компанидаа шилжүүлэхийг үүрэгдэж суусан бол нөгөө гараараа тус онд Хөдөлмөр эрхлэлтийг дэмжих сангаас олгодог зээлийг албан тушаалаа ашиглан танил талдаа шийдвэрлүүлсэн.  

Учир нь, Хөдөлмөр эрхлэлтийг дэмжих сангаас 2016-2017 онд албан тушаал, эрх мэдлээ ашиглан зориулалтын бусаар, тендергүйгээр нэр бүхий компаниудад зээл олгосон хэргээр ХХҮЕГ-ын дарга Б.Нямдаваа, Хөдөлмөрийн асуудал хариуцсан дэд дарга Б.Шижиржаргал нарыг хууль хяналтын байгууллагаас шалгаж буй. АТГ болон хууль хяналтын бусад байгууллагад сар гаруй хугацаанд тасралтгүй шалгагдаж буй дээрх хоёр албан тушаалтан өнгөрсөн долоо хоногт ноцтой мэдүүлэг өгсөн байдаг.  Бор зүрхээрээ хөдөлмөр эрхлэгч, бизнесээ өргөжүүлэхийг хичээж буй аж ахуйн бичил бизнес эрхлэгч, хөгжлийн бэрхшээлтэй иргэд, МСҮТ төгсөгчид, малчдад очих ёстой байсан 2.7 тэрбум төгрөгийг хэн гээч УИХ-ын гишүүн, өндөр албан тушаалтнууд хувааж хүртсэн гэдгийг хүргэе.

1. УИХ-ын гишүүн Батсүхийн Саранчимэг нь “Монгол Сор Хөгжил Олон Улсын Академи” ТББ-ийг монгол зөөлөн тоглоом, даавуун эдлэл хийлгэхээр 200 сая төгрөгийг тендергүйгээр зээлэхэд нь эрх мэдлээ ашигласан болзошгүй.
2. УИХ-ын гишүүн асан Наваан-Юндэнгийн Оюундарь тус сангаас Сэлэнгэ аймгийн Шаамар суман дахь “Ээж Оюу Сайхан” нэртэй компанид олон улсын жишигт нийцсэн авто зам засвар, авто угаалгын газар байгуулах зорилгоор 100 сая төгрөгийг олгуулахад нь нөлөөлсөн байж болзошгүй.
3. УИХ-ын гишүүн асан Намсрайн Амарзаяа Өмнөговь аймгийн Даланзадгад хотод харьяалалтай гэх ”Амин хэлхээ байгаль сан”-д 123.9 сая төгрөгийг олгоход нь албан тушаал, танил талаа ашиглан нөлөөлсөн байж болзошгүй.

Бид үргэлжлүүлэн энэхүү мэдээллийг дэлгэрэнгүй хүргэх болно.