Сонгууль дөхөхөөр улстөрчид гэнэт гарч ирдэг шиг хэдэн жил царцсан эмнэлэг, сургууль, зам засварын ажил сонгуулийн өмнөхөн зэрэг эхэлдэг. Энэ жил бүр 72 цагийн дотор замтай болж болдогийг нийтээрээ харлаа. Зам засварын ажлыг хэдэн сар, жилээр хүлээдэг иргэд гайхаж, баярлахдаа “Гуравхан өдрийн дотор зам засчих байсан юм бол яагаад найман жил биднийг зовоосон юм бэ. Хэдийгээр сонгууль дөхсөн ч гэлээ хийе гэсэн сэтгэл байвал хийдэг л юм байна. Сонгуулиас өмнө метрогоо бариулмаар байна” гэх мэтчилэн цахим орчинд  үзэл бодлоо илэрхийлсээр байна. Харин дарга нар иргэдээс оноо авахын тулд сонгуулиас өмнө нэг ч болтугай гэрэлтүүлэг илүү тавихыг хичээж, тал бүрд эрвийх дэрвийхээрээ зүтгэцгээсээр. Өнгөрсөн жил болон энэ жил арай олон зам тавьж чадсангууд нь тайлан мэдээ хүртэл гаргаж байна. Улаанбаатар хотод манай улсын нийт хүн амын 46 хувь нь оршин сууж байна. Мөн их сургуулиудын 95 хувь, аж ахуйн нэгжүүдийн 67 хувь, тээврийн хэрэгслийн 68 хувь, ерөнхий боловсролын сургуулийн 38.1 хувь, цэцэрлэгийн 45 хувь нь нийслэлд бий.

     Харин сонгуулийн ачаар нийслэлийнхэн хэдэн зам, гэрэлтүүлэгтэй болж авах нь. Өнгөрсөн долоо хоногт 2-3 зам ашиглалтад орж, хөдөлгөөнөө нээсэн. Тухайлбал, уулын зам буюу Хөдөө аж ахуйн их сургуулийн уулзвараас Яармагийн гүүр хүртэлх автозамыг 72 цагийн дотор шинэчилж, өчигдөр ашиглалтад оруулсан. Мөн тавдугаар сургуулийн уулзвараас Их сургуулийн гудамж хүртэлх авто замыг долоо хоногийн дотор шинэчилж, хөдөлгөөнийг нээсэнд олон нийт сайшаалтай хандаж байгаа. Ингээд нийслэлийн зургаан дүүрэгт сүүлийн өдрүүдэд ямар бүтээн байгуулалт ашиглалтад орсон талаар танилцуулъя. 

-БАЯНГОЛ ДҮҮРЭГ 2022-2023 ОНД 204.5 ТЭРБУМ ТӨГРӨГИЙН БҮТЭЭН БАЙГУУЛАЛТ ХИЙЖЭЭ

Тус дүүргийн Засаг дарга Ө.Сумъяабаатар УИХ-ын сонгуулийн есдүгээр тойрог буюу Баянгол дүүрэгт МАН-аас нэр дэвшиж байгаа. Тиймээс эртнээс дүүргийнхээ бүтээн байгуулалтын ажилд санаа тавьж, гэр хороололд тавьсан замаараа өөрийгөө сурталчилж байх жишээний. 2021-2023 онд Баянгол дүүрэгт 50 тэрбум гаруй төгрөгөөр 33.1 километр автозамын ажил хийсэн гэх. Харин 2021 онд 20 хорооны 78 байршилд 22.7 километр автозамын ажлыг 20 тэрбум төгрөгөөр хийсэн байна. Тухайлбал, “Модны-2”-ын уулзавраас Гэмтлийн эмнэлэг хүртэлх замыг дөрвөн эгнээ болгосон. Гэр хороололд Сонгинохайрхан дүүрэгтэй холбогдох 3.3 километр замыг шинээр тавьсан. Жасрайн гудамж, Амарсанаагийн гудамжны замыг шинэчилсэн. Нарын гүүрний баруун талаас Мод боловсруулах үйлдвэр хүртэлх замын шинээр тавьсан. Харин энэ онд 25 хороонд 26.7 тэрбум төгрөгийн замын ажил хийгдэх аж. Зам засварын ажлаас гадна 164 дүгээр цэцэрлэгийн өргөтгөлийг дуусгаж, цэцэрлэг тойрсон явган хүний зам, авто зогсоолыг ашиглалтад оруулсан. 113 дугаар сургуулийн гадна фасад, засварын ажил, “Сэтгэмж” цогцолбор сургуулийн өргөтгөлийн ажлыг дуусгажээ. Мөн тус дүүргийн 19 дүгээр хороонд байрлах 61 дүгээр байрны ханын түшиц, ханын засвар хийж, Нарны хороололд 34 гэрэлтүүлэг шинээр суурилуулжээ. Мөн Баянгол дүүрэг өнгөрсөн онд зургаан хороонд 16 цамхагт гэрэлтүүлэг суурилуулсан бол энэ онд 28 гэрэлтүүлэг суурилуулахаар төлөвлөсөн байна. Тус дүүргийн хоёрдугаар хороонд байрлах 51 дүгээр суруулийн өргөтгөлийн ажил, 13 дугаар хороонд тохижилтын ажил, 61, 68 дугаар байрны гадна фасад, хүүхдийн толгоомын талбайг тохижуулжээ. Нарны гүүрээс Энхтайвангийн гүүрийг холбосон дунд голын арын хэсэг буюу 1.5 километр явган хүний замд гэрэлтүүлэг хийж, 94 дүгээр цэцэрлэг, тоглоомын талбайг засварласан ажлыг сүүлийн үед хийжээ.

-АЙЛ БОЛГОН ХАШААНДАА МОД ТАРИХ ТӨЛӨВЛӨГӨӨТЭЙ БАЯНЗҮРХИЙНХЭН

Баянзүрх дүүргийн засаг дарга Н.Баярмөнх УИХ-ын ээлжит сонгуулийн наймдугаар тойрогт МАН-аас нэр дэвшиж байгаа. Тус дүүрэг энэ жил 4000 айлын хашаанд 40 мянган мод тарьж ургуулах төлөвлөгөөтэй гэх. Өнгөрсөн хавар тус дүүрэгт хэд хэдэн газар автозамын ажил хийгдэж дууссан. Баянзүрх дүүрэгт дахин төлөвлөлтийн хүрээнд чөлөөлсөн олон газар байгаа. Компаниуд нь санхүүгийн чадамжгүй болж, үйл ажиллагаа явуулалгүй удсан газруудад төлөвлөлт хийх, орон сууцжуулах хөтөлбөр боловсруулах саналыг НИТХ-ын хурлаар гаргасан байдаг. Тус дүүргийн хувьд бүтээн байгуулалтад анхаарахаас гадна агаар, хөрсний бохирдол, иргэдийн хоол хүнс, эрүүл аюулгүй орчинд амьдрах орчин нөхцөлд нь илүүтэй анхаарчээ.

-ХАН-УУЛ ДҮҮРЭГТ СУРГУУЛЬ, ЦЭЦЭРЛЭГ ШИНЭЭР АШИГЛАЛТАД ОРОХОД БЭЛЭН БОЛЖЭЭ 

Тус дүүргийн Засаг дарга мөн энэ жилийн сонгуульд МАН-аас нэр дэвшиж байгаа. 2021-2024 онд тус дүүрэгт 12 сургууль, 17 цэцэрлэг, зургаан бага сургууль, цэцэрлэгийн цогцолбор ашиглалтад орох аж. Мөн гурван жил гацсан замыг энэ сард ашиглалтад оруулахаар төлөвлөсөн байна. Мөн Айдасын давааны зам засварын ажлыг эхлүүлжээ. Мөн тус дүүрэгт сүүлийн үед хийгдсэн томоохон бүтээн байгуулалтын нэг нь Нисэхийн дэнж дээрх цэцэрлэг, сургуулийн барилга удахгүй ашиглалтад ороход бэлэн болсон байна. Үүнээс гадна 26 байршилд 3х3 сагсан бөмбөгийн талбайтай болжээ. Яармагийн гүүрнээс Нисэхийн аюулгүй тойрог хүртэл гурван хэмжээст хийцлэл бүхий цэцэгт байгууламж хийхээр төлөвлөн ажиллаж байгаа аж.